E curpa cu nos tin no ta di nos mes, e ta di Dios, pasobra ta Dios a forma nos den barica di nos mama, y ningun hende a forma nan mes.
Locual hende ta bisa cu ningun hende tin nada di bisa mi kico mi ta haci cu mi curpa, ta algo cu ta demostra lo siguiente:
*Un mente cu tin falta di conocemento di e palabra di Dios.
*Un boca rebelde.
*Un persona cu no a haña ta necesario pa reconoce Dios,den su bida ( Romanonan 1:28-32.)
Tambe e tin hopi di demostra e tempo trabahoso cu nos ta bibando aden ( 2 Timoteo 3:1-5).
Nos curpa ta algo di gran balor , pasobra e Spirito di Dios ta biba den nos.
Ta p’esey ora hende mete cu bruheria, idolatria, y santeria , hende su mentalidad ta cambia pasobra nan a contamina ,locual Dios a traha puro, limpi y berdadero.
Den 1Corintionan 3:16-19 ta para skirbi: Bo so no sa cu boso ta e tempel di Dios, y cu e Spirito di Dios ta biba den boso? Si un hende destrui e tempel di Dios,Dios lo destrui e. Pasobra e tempel di Dios ta santo, y esey ta loke boso ta.
Awor tene cuenta cuanto hende ta destrui nan mes cu:
· Adicion na Droga.
· Adiccion na Alcohol
· Adulterio y Fornicacion
· Inmoralidad/
· Homosexualismo
· Lesbianismo.
· Transgenerismo
· Orguyo
· Arogancia
· Materialismo
Tur esey ta sosode ora hende dicidi cu ta nan ta manda riba nan curpa y no kier haci locual Dios ta bisa. Hopi biaha nos ta mira hende bunita pafo, pero paden nan tin dolor y nan mente ta hopi confundi.
Den 1Corintionan 6:18 -20 e palabra di Dios ta bolbe splica atrobe : Huy for di tur inmoralidad . Tur otro pica cu un hende comete ta pafo di e curpa. Ma e hende inmoral ta peca contra su mes curpa. Of boso no sa cu boso curpa ta e tempel di Spirito Santo kende ta den boso.
Kende boso tin di Dios, y cu boso no ta pertenece na boso mes. Pasobra boso a wordo cumpra pa un prijs; p’esey glorifica Dios den boso curpa.
E asunto aki nos tin di comprende bon pa asina reconoce nos identidad den Cristo Hesus, caminda nos a wordo traha segun imagen y semehansa di Dios.
Si un hende no ta comprende algo, ta bon pa splica di nobo varios biaha , pero si un hende ta compronde hopi bon y ta persisti cu e tin di sigui haci y biba segun su propio capricho y duresa di curason, e persona ey ta montona furia di Dios pa su mes.( Romanonan 2:5).
Ora un hende ta haci robes, pasobra e no sa, e ta wordo considera como ignorante,pero ora un hende sa y e ta continua den scuridad, y hasta ta invita otronan pa tene man cu ne, e ora ey nos a yega na malicia organisa.
Tene cuenta cu nos hubentud pasobra nan ta e futuro di mañan cu Dios kier.
Y laga nos haci tur locual ta posibel pa lanta nan den e caminda di Dios manera Efesionan 6:1-4.
E tempo no ta facil, p’esey e esfuerso ta necesario, specialmente awor cu nos ta mira cu inmoralidad y abominacion kier domina mundo henter.
Awor mas cu nunca nos oracion mester ta constante, y no lubida yuna y lesamento di palabra, y no keda sin congrega, pasobra e forsa spiritual ta necesario pa nos tur.
Dios no kier pa ningun hende bay perdi, pero pa tur por yega na bida eterna den Cristo Hesus.
Dicidi awor pa Señor.
Skirbi pa Pastoor Marcel Balootje
