Desde 7:30 pm coriente a bay den varios bario den e districto di Paradera. NV ELMAR a informa cu nan tin un “storing” den area Paradera, specificamente den bario di Cumana, Tanki Leendert, Papaya, Nuñe, Sero Patrishi y Sero Blanco un parti.
Pa algun bario, esaki ta di dos dia consecutivo cu coriente ta bay. Claro cu nan no ta contento cu e nivel di servicio di nos compania nacional di distribucion di coriente. Locual a sosode ayera ta cu un blaas di helium a bay pega den e kabelnan di coriente, cu consecuencia cu e sistema di siguridad a activa y kita coriente. Den un rato e tecniconan a topa cu e blaas y asina a resolve e storing pa por a duna coriente bek na e barionan activa.
Echo ta cu casi tur dia coriente ta bayendo den un of otro bario. Tecniconan ta insisti cu no tur ora ta nan falta, pasobra auto ta dal den pal’i luz, blaas ta pega den nan sistema y otro retonan. Pa core tur kabel bou tera ta costa hopi placa cu NV ELMAR no tin na e momentonan aki.
