Diaranson atardi un reglamento di cuenta a bay for di man dilanti di un supermercado na Meiveld,cu a termina cu bashamento di bala. E bisiñanan lo a scucha por lo menos cuater tiro. Tin tur indicacion cu esaki tabata un deal di droga, cu no a resulta exitoso, pa cual a dicidi di cuminsa tira. Despues di esaki, un persona a sali na careda, bandonando sitio, lagando te hasta un slof atras, mientras c’un otro a resulta herida.
Tur cos ta indica cu ta e homber den e KIA Cerrato lo ta esun cu a tira riba esunnan cu tabata den e Honda Fit. Motibo pa cual e homber di e KIA Cerrato a resulta herida, tabata door cu tabatin un bringamento n’e sitio y e homber den e KIA Cerrato a haya bati di su bida.
Segun informacion preliminar, tin un investigacion exhaustivo tumando luga actualmente, n’e supermercado na Meiveld, caminda e incidente a tuma luga.
Tanto polis di Oranjestad como di Santa Cruz ta na e sitio y a cera e area pa asina por haci e investigacion necesario.
Un noticia sigur cu a difundi rapidamente, generando preocupacion y consternacion entre e residentenan di e zona. Di biaha a alerta e autoridadnan competente y a desplega un ekipo investigativo pa e sitio.
Un rato despues, a drenta e informacion cu un persona herida a yega hospital den un KIA Cerrato, pa ricibi asistencia medico.
CAMARA DI SIGURIDAD
E camaranan di siguridad ta mustra cu ta un Honda Fit lo a yega n’e sitio y tres persona a baha for di dje y a cana bay den direccion di e KIA Cerrato, cu tabata para un poco mas pariba. Riba e imagennan por a nota cu un di e hombernan tabata mishi cada rato cu su bariga. Despues di un rato, tiro a cay, unda cu tur tres persona a sali na careda bay for di e sitio, den e Honda color preto. Un di cuater persona, tambe hende homber, a core bay for di e sitio.
Polis di tanto Oranjestad como di Santa Cruz ta na e sitio y a zet af henter e area pa asina conduci e investigacion.
UPDATE
Un rato despues a resulta cu e homber den e KIA Cerrato a yega hospital, cu e auto tur na mancha. Pero pa su mala suerte, el a yega hospital, ainda cu e arma uza den e tiramento na Meiveld, ainda den su posesion.
