Pa e parlamentarionan Marco Berlis y Hendrik Tevreden, e tema di matrimonio di mesun sexo ta un tema delicado y resultado di votacion ta ilustra con e pensamento tambe ta den comunidad. Ambos parlamentario di fraccion di MEP a vota contra e proyecto di ley matrimonio di mesun sexo pa cual awo mester bay pa un otro ronda di votacion. Si e reunion ta bini prome cu decision di Corte di Casacion riba e mesun tema aki, no ta conoci.
Aruba a pasa un momento historico diaranson ora cu parlamento mester a vota riba e proyecto di ley pa matrimonio di mesun sexo. E resultado di 10 voto na fabor y 10 en contra a laga tur hende sorprendi y tambe politica en general. Ta prome biaha den 37 aña di existencia di Parlamento di Aruba ta haya un resultado den forma di empate. Pa e motibo aki lo mester bay den un otro ronda di votacion. Y den caso cu keda un empate atrobe, e ley ta keda anula, segun parlamentario Marco Berlis a splica.
Te awo no tin un fecha convocatorio pa e reunion aki. No sa tampoco si e lo ta prome cu e decision di Corte di Casacion, riba 31 di mei awor.
Berlis a bisa cu un tema manera esun aki, nunca por bisa con e reunion lo desaroya y resulta. “Esaki pasobra tur hende tin experiencia y creencianan diferente. Nos tin cu bolbe pa un otro votacion y si haya e mesun resultado, e ley ta anula.”
A puntra e parlamentario si henter e sucedido of e forma con e reunion a desaroya y su resultado no tabata un strategia. El a tuma algun seconde pa pensa y despues bisa “esey tabata un di nos puntonan. Pakico mester a yama e reunion aki si e fecha di casacion t’asina cerca. Sinembargo e iniciadonan di e ley tabata kier algo diferente.”
E resultado na final a mustra con dividi parlamento ta riba e tema di matrimonio di mesun sexo.
Berlis no tabata kier a comenta riba e posicion tuma pa su colega di fraccion, Shailiny Tromp Lee, kende a abstene di vota na final. “Mi no ta papia p’e. Mester respeta esey pasobra e ta un tema hopi sensitivo y mi ta laga pa e mes duna su comentario, si e kier haci esey.”
Su colega Hendrik Tevreden, lider di fraccion di MEP, tin pensamento similar. E votacion, el a bisa, ta refleho di loke ta biba den comunidad. “Nos comunidad tin hendenan cu ta pro y otronan cu ta contra. Y tambe tin hende cu no a dicidi nan posicion riba e tema. Y den nos coalicion e no ta diferente. Y den fraccion AVP tampoco e ta diferente.”
Ta trata di un tema hopi delicado cu por yega hopi cerca di famia y amistadnan. E ta algo hopi sensitivo. Y ta tur caminda rond mundo e sentimentonan ta varia riba e tema. Pues no solamente den politica y e comunidad na Aruba. “Mi ta kere cu e hendenan mester dicidi ainda unda of con nan ta para riba e tema y esaki a keda refleha den parlamento.” Pero tambe e ta un refleha den comunidad, cu no sa ki direccion pa tuma. “P’esey mi ta kere cu dialogo ta e miho caminda pa continua, si nos ta habri pa dialoga cu otro.”
