Ta parce tin un competencia pa huy for di Polis. Diaranson anochi tabatin otro caso di personanan cu a huy na momento cu a bay pa controla nan.
Rond mey anochi un patruya policial a bay controla un Chevrolet Aveo, cu tabata mobilisando den e area unda tin boto mara cerca di Ritz Carlton.
E movecion eybanda na e ora laat a hala atencion di e Polisnan cu a dicidi di haci un control. Pero na momento cu e persona a baha for di auto, el a pensa “pia pa ki mi tin bo” y a huy for di gara di autoridad.
A sigui su tras, pero den e scuridad tabata hopi dificil pa haya e persona cu tabata core den e auto A-22896. No sa e momento ey si e auto tabata horta of e number ta horta, pa cual a transporta e vehiculo pa warda pa mas investigacion.
Den oranan di mainta ayera tabatin un caso tambe unda a aresta dos persona indocumenta di cual un di nan a logra huy y te na e momentonan aki no a logra detene.
