Awor cu Dia di Mama ta acercando, pero pa esun cu stima su mama, tur dia ta dia di mama.
Laga nos para keto y yama Dios danki pa hende muhe, pasobra hende muhe ta e creacion di Dios, cu Dios a usa hunto cu hende homber , pa multiplica, ser humano riba e mundo.
E creacion di hende muhe ta unico, su organonan no por wordo imita, locual ta sosode den barica di un muhe ora e ta na estado, ta un secreto cu Dios so por revela na nos.
For di den principio di mundo diabel tabata sa e proposito di hende muhe riba tera, pasobra e encargo cu Dios a duna Adam y Eva pa multiplica y yena mundo, a wordo haci publicamente den Eden.
P’esey e diabel a bini riba Eva pa asina purba stroba e trabao di Señor, pero e a keda mal para, pasobra e a wordo maldiciona y Eva con duro cu nan disciplina por tabata, Eva a bira mama di tur nacion, pasobra e ta prome muhe cu a duna luz na mundo segun e bijbel ta siña nos.
E matrimonio di Adam cu Eva no tabata uno facil, pasobra den nan bida matrimonial e prome crimen den famia a tuma luga caminda Cain ta mata su ruman Abel pa envidia( Jaloers).
Dios nunca a stop di uza hende muhe pa proposito grandi riba e mundo , nos tin cu corda cu si no tabata pa e ayudo di Rahab e prostituta, e spionnan no por a drenta e tera priminti.
Locual e enemigo a lubida ta cu pa medio di un muhe ta e unico forma pa Dios por a trece su Yiu unigenito na mundo, kende a bini pa salba tur esunnan cu ta kere den dj’E y tambe pa derota e enemigo.
P’esey nos tin cu tene debido cuenta con nos ta trata e ser cu yama hende muher, den tur ora, y na tur momento.
Mama ta un pilar den sociedad, pasobra tur yiu tin un mama, mama ta un ehempel di bendicion di Dios, cada biaha cu nos mira un hende muhe na estado, nos tin cu corda, locual a wordo declara den Genesis 1:27-28.
Proverbionan 31:26-29 ta para skirbi: E ta habri su boca cu sabiduria,y siñansa cariñoso ta riba su lenga, e ta tene caminda nan di su famia bon na bista, y no ta come pan di flohera.
Su yiunan ta lanta y ta yam’e bendiciona, su esposo tambe y e ta gabe bisando: Tin hopi muhe cu ta haci bon, ma abo ta surpasa nan tur.
E trabao di mama ta asina grandi y asina bunita riba e mundo aki, cu awor tin hende cu kier horta autoridad di mama, nan kier bira mama sin ta hende muhe, cu tin tur derecho di wordo yama como mama, pasobra ta Dios a establece esey.
Isaias 66:13 asina Señor ta bisa: Manera esun cu su mama ta consola. Asina lo mi consola boso y boso lo keda consola na Jeruzalem.
P’esey nos no por lubida locual ta para skirbi den Efesios 6 :1-3: Yiunan obedece boso mayornan den Señor, pasobra esaki ta husto. Honra bo tata y bo mama,( cu ta e prome mandamento cu promesa) pa bay bo bon. Y pa bo tin bida largo riba tera.
Den esaki Dios kier recorda tur yiu, cu nan mama mester wordo stima y bon trata tur momento.
Mama no mester wordo bandona, pasobra mama a carga tur hende trece mundo.
P’esey tur yiu mester stima nan mama.
Skirbi pa Pastoor Marcel Balootje
