Den e votación riba e proyecto di ley di matrimonio di mesun sexo a resalta cu cada parlamento tin e libertad pa vota pa algo según su consenshi. Esaki ta loke cu parlamentario di e fracción di AVP, drs. Mervin Wyatt-Ras, a expresa.
Na final di e reunion diaranson anochi a combersa cu parlamentario di AVP drs. Mervin Wyatt-Ras riba e resultado di e tratamento di e ley controversial riba “matrimonio di mesun sexo”, E politico ta menciona cu ora ta trata di un ley controversial, a palabra cu mester vota “segun opinion y pensamento propio.”
Fraccion di AVP a mustra cu cada miembro di parlamento por tin nan opinion. Segun Wyatt-Ras ta mustra cu durante e reunion partido MEP no a “sostene” nan miembronan y di coalicion y lo a “spera mas” di nan. Segun su persona a mustra cu durante votamento parlamentario Setty Christiaans-Yarzagaray a vota na fabor, pero di otro banda a compronde cu parlamentario Shailiny Tromp-Lee “no kier a bin den sala pa por a vota, door cu e lo no ta di acuerdo of no kier sostene e ley”.
Segun e parlamentario di fraccion di AVP ta señala cu “MEP tin e dogma ainda cu e lider ta esun cu ta dicidi kico e miembronan ta haci , den AVP esey no ta e caso”. Wyatt-Ras a agrega bayendo den pasado cu su persona mes a bira victima durante cu e tawata forma parti di partido MEP, unda cu a saca tanto su persona como Marisol Tromp (awendia lider di MAS) for di MEP, debi cu su persona y Tromp a vota na fabor di un ley cu e partido geel no ta kere aden”, – ‘E ta jammer’ – asina e politico a enfatisa.
E resultado ta cu e ley a keda empata na 10-10, consecuentemente e ley no por pasa. A schors e reunion pa por sigui cu atende aspectonan di e ley. E politico a mustra cu ayera henter dia tawata tin un discusion cu Presidente di Parlamento cu a yama un “Senioren Convent” debi na un desacuerdo riba un cambio cu un persona por keda den sala y keda sin vota.
Wyatt-Ras a mustra cu nan fraccion a bay contra e cambio aki. Durante transcurso di dia ayera, e fraccion berde a trece nan puntonan di critica den reunion di parlamento cu, segun e politico a señala, e Presidente “a pone un banda” nan critica. Ta mustra cu despues e Presidente di Parlamento a reconsidera loke e fraccion a protesta durante dia den parlamento.
E miembro di parlamento pa e partido di oposicion a mustra cu despues di e criticanan cu nan fraccion a vocifera, e Presidente di Parlamento a bay papia esaki “den nan fraccion, anto hopi di nan a vota contra.”
Na final e politico a mustra cu ta algo bon cu miembronan di parlamento ta bin cu leynan di iniciativa, Wyatt-Ras mes a bin cu iniciativanan den pasado, pa asina por crea mas igualdad den comunidad.
