E Gobiernonan di Iran y Rusia a sali dilanti diahuebs a base di e acusacionnan lansa pa Cas Blanco y a nenga di ta tras di e mandamento di e-mailnan menasante na votantenan di Merca y di un intento pa interferi den e proceso electoral
Tanto Tehran como Moscu a tilda di ta “infunda” e alerta emiti diaranson pa e director di Inteligencia Nacional di Merca, John Ratcliffe, segun cual ambos pais ya a obtene informacion di votantenan Mericano y ta purbando di interferi den e eleccionnan di dia 3 di november, den cual presidente Donald Trump lo midi cu e democrata Joe Biden.
“E Republica Islamico di Iran ta rechasa den varios ocasion alegacionnan inventa y engañoso di e funcionarionan di e regimen Mericano y ta reitera cu, pa Tehran, no ta importa cual di e dos candidatonan actual di Cas Blanco” gana e eleccion, vocero di Exterior di e Gobierno Irani, Said Jatibzadeh a bisa.
Di su parti, vocero di e Gobierno Ruso, Dmitri Peskov, a sigura cu e acusacionnan contra Rusia “ta yegando tur dia, tur ta absolutamente infunda, no ta basa riba nada. Mas bien ta un tributo na e procesonan politico interno asocia cu e proximo eleccionnan” presidencial na Merca.
Aunke Cas Blanco tambe ta sostene cu Risa ya a haya dato di votantenan mescos cu Iran, ta mustra cu te asina leu no tin evidencia cu nan a uza e informacion cu nan a obtene.
Alarmanan tin lunanan largo ta zonando na Washington pa no ripiti loke a sosode na 2016, ora cu piratanan informatica Ruso a logra interveni di forma camufla den e debate politico di Merca pa influencia den e resultadonan electoral, un actuacion cu segun e democratanan lo a yuda presidente Donald Trump pa gana e eleccion.
Den e ultimo dianan, votantenan democratanan den e estadonan manera Florida of Alaska a ricibi emailnan intimidante supuestamente manda pa e grupo ultraderechista Proud Boys, pero Gobierno ta bisa cu en realidad nan ta manda pa Iran, y cu a menasa e democratanan pa nan vota pa Trump.
Na margen di e agencianan di siguridad, e propio empresanan tecnologico ta desempeñando un papel crucial pa e lucha contra menasanan informatico, manera cu e actuacion mas relevante di e ultimo lunanan ta prueba, lidera pa Microsoft mediado di october y caminda cu a desmantela un red masivo di secuestro di dato of “ransomware.”
E empresa di e sistema operativo Windows a logra elimina e red Trickbot, caminda cu hackernan profesional ta bende nan servicionan na criminal y estado-nacionnan pa lansa operacionnan di ‘ransomware’ y cu den e ultimo cuater añanan a infecta mas di un miyon di computer rond mundo.
Microsoft a splica cu e tipo di atakenan aki ta un di e mayor menasanan na e proceso electoral, ya cu nan por uza pa infecta e computernan den cual e lista di electornan ta warda of desde esunnan cu ta informa di e resultadonan despues di e eleccion, hortando dato y generando un situacion caotico.
Autor: EFEI0373
