Awe tardi a tuma luga un reunion di Comision Central pa trata un solo punto di agenda, y esey ta trata e retiro di minister di Infrastructura, medio ambiente y desaroyo teritorial, Marisol Lopez-Tromp.
Aki ta scucha e sentimentonan di Parlamento riba un carta cu Su Excelencia Gobernador a manda, despues cu el a haya un carta di Gobierno. El a manda un carta Parlamento unda cu Conseho di Minister dia 21 di october, pa awe retira minister Marisol Lopez-Tromp for di su funcion, na mesun momento pa nombra prome minister Evelyn Wever-Croes temporalmente cu e cartera di infrastructura, medio ambiente, etc.
Parlamentario Arthur Dowers a splica cu a yama e reunion den un rato masha lihe. E ansha ta hopi grandi pa e cartera bay cay den man di un hende di MEP. Esey ta bisto.
Loke cu fraccion di AVP ta keda sorpresa cun’e, ta cu despues cu e politiconan di MEP a insisti cu lo tabata tin un mocion di desconfiansa pa baha e minister aki, cu gobernador ta manda un carta awe pa bisa cu e kier tende e informacion for di Parlamento pa sa su opinion.
E carta cu a bin di gobernador ta confirma pa fraccion di AVP cu e mocion cu MEP y POR a pasa no por a yega gobernador.
Ta di supone cu a tir’e den bari di sushi y loke e prome minister a haci ta cu e mes a traha un Landsbesluit unda cu ta bisa gobernador cu no tin union mas den e gobierno aki y cu e falta di union ta trece e gobernacion na peliger.
Basa riba esey gobernador ta manda puntra Parlamento riba su opinion. Fraccion di AVP no ta parti di e cos aki pasobra ta un reunion interno di Parlamento caminda ningun hende por tende loke ta bisa.
Ta un reunion cu no tin quorum. Si cada un di e fraccionnan cu ta sostene e gobierno bisa cu nan ta di acuerdo pa baha e minister aki, e ora e minister su careda a caba y e ora ey e confirmacion a bin tambe cu corupcion y proteccion di bagamunderia ta cos cu ta para central den e gobernacion aki, cu ken cu ta cu purba di divulga cosnan cu ta robes den e gobernacion aki lo a cana e mesun destino aki. Na final di dia ta nan gobierno, ta nan cu nan a cera esaki.
E capitulo di e diferente novela of comedia ta sigui. Ta keda pendiente pa mira kico e decision lo bay ta, pero na final di dia ta den nan man, ta nan ta dicidi kico nan ta haci den nan gobierno.
Esey, AVP como oposicion, ta para pa democracia. E resto logicamente ta keda den man di e politiconan cu ta sostene gobierno, si nan kier pa e minister keda den nan gobierno.
Marlon Sneek, como lider di fraccion di AVP, a comenta di su banda, cu for di un principio nan no lo ta parti di e cos aki.
Ta nan ta gobierno, ta nan minister, ta nan ta dicidi ken nan kier pa ta minister y ta den nan man. Loke si por a mira si, cu ta scoge pa purba di tapa e eror garafal cu e presidente di Parlamento a haci di pasa un mocion sin tabata tin quorum den sala. Awe por a mira cu mester a tuma otro pasonan pa core cu e minister cu ta sacando nan berdad afo, pasobra cu na dado momento ta mira cu e mocion no tin base legal.
Pesey no por a uza e mocion. Awe tin un presidente di Parlamento cu ta faya cu regla, cu ta faya cu proceduranan y ta haya un prome minister cu den prome instante a gaña pueblo y cu a sigui gaña.
E carta di gobernador ta papia palabra cla. Un decision cu prome minister ta tuma di retira e minister aki for di su gabinete. No a base di un mocion cu Parlamento a tuma, sino un decision cu e prome minister a tuma, cu a bisa cu no sa di nada, awe por a mira cu e ta esun cu a tuma e decision cu e kier get rid di minister Marisol Lopez-Tromp.
Por ta ta pasobra den e caso aki e terenonan, huurgrondnan cu mester a pasa pa su coordinadornan no a keda cla, el a rabia y awo lo a core cu e minister.
Esaki ta un grupo di hende cu a bay pa horta un banco, pero ningun ta confia otro. Awe por a mira cu ningun hende no ta confia otro. Tur ta tilda otro di corupcion. Un ta entrega keho contra otro. Pa AVP, un tristesa sigur den e pandemia aki, den e situacion financiero di e pais, e discusionnan cu tin cu Hulanda y aki na Aruba, ta den discusion si ta sostene of no di un minister.
E tipo di cosnan aki tin ta tumando luga na Aruba, segun Marlon Sneek.
