Magy Marin of miho conoci como Margaret Marin no ta un persona desconoci den e mundo di musica. Su pasion pa musica a cuminsa desde cu e tabatin 5 aña. E no ta conoci pa canta cantica folkloriko so, pero tambe a participa den Caiso & Soca Monarch.
E aña aki, cu ta un aña conoci di reto, no a stroba Marin cu su soño y esey ta pa bira solista. Segun Marin, e cambio di nomber di Margaret pa Magy ta bin door cu e ta lansa su mes como solista. Pa lansa su mes como solista, el a scoge un cantica gospel, un cantica cu ta acerca hende mas na Dios. Marin a lansa su mes como solista cu un cover titula “Aqui estas.” “Mi a scoge e cantica aki, pasobra mi gust’e hopi pero tambe e ta yega na tur hende su curason,” el a expresa.
Pa por a termina henter produccion di “Aqui esas,” tabata trabou di 1 siman completo. “Mi ta contento di por a lansa mi cover nobo. Un cover cu nos a hinca hopi ora den dje,” segun Marin. E ta gradici na R. Curie di Shine Music Studio pa a graba y traha riba e mix di cantica, na John Kelly di a filma henter e video, tambe na Diamonds Sound Lighting Solution and Music Entertainment pa a percura p’e parti di efecto y luz.
“Sin boso mi no por a logra cu e proyecto aki. Mi no por keda sin gradici mi famia cu semper a sostene mi. Tambe tur esnan cu a like y share mi video.” Pa mas informacion di e cover “Aqui estas”, por bay riba e pagina di Facebook Magy pa scucha e cantica.
