Despues di hopi denuncia haci, por bisa awo cu Dienst Openbare Werken (D.O.W.) a logra haya solucion pa awa sushi di riool cu ta keda para riba caya na waf chikito. E mahos tabata cu e turistanan mester cana pasa den e awa sushi aki.
Ing Daryl Lue, hefe di departamento na infrastructura di D.O.W., a splica cu e awa sushi para’ki no ta un problema recien pero algo di un par di aña caba cu D.O.W. a bin ta studia pa logra yega na un bon solucion. E pensamento tabata con pa mitiga e riesgo cu awa sushi (di riool) ta bay lama of pasa over.
A bin constata cu un di e problemanan ta ora cu lama subi. Pero specificamente un restaurant den e area tin un pomp cu ora activa esaki, ta pone e tubo bou hopi presion. Door cu e lama a subi, e pomp ta cendi y e linea ta yen, e awa ta subi y sali afo patras di Paddock.
E negoshi Lucy’s Retired Suerfers Bar & Restaurant a duna tur su cooperacion pa yega na un solucion. Renaissance Wind Creek Aruba Resort di su banda a yuda financia e proyecto di biaha y a percura pa tur e materialnan. Mientras cu D.O.W. a provee e manpower pa realisa e proyecto cu mester trece un mehoracion den e area di waf chikito.
Pa realisa e proyecto aki, mester a pone otro trabounan on hold un rato, debi cu esaki ta mas urgente pa e ubicacion di area turistico. A realisa e trabou riba diasabra pero tambe durante algun dia den siman.
Awo e situacion ta bou di control. A minamalisa e riesgo di holo y cu e awa sushi por sali.
Tambe tin hopi critica cu den areanan hotelero tin un situacion fastioso di mal holo cu ta bini di awa di riol. Diferente biaha a saca potret unda por mira cu awa ta bay laira manera fontein. Specificamente den e area di Palm Beach funcionarionan di D.O.W. cada biaha ta constata problema cu vet den e sistema di riolering.
Segun Lue a splica, vet no ta bon pa e sistema di riolering y e no ta suppose di ta eyden mes. Unabes cu e sistema detecta e vet, e sensor no ta funciona mas. Si e sensor bay off no tin algo cu ta lesa cu e riolering ta yen of no. Esaki ta causa cu e pomp no ta haya señal cu e mester cende y e poz ta pasa over. Esaki ta trece cu ne cu awa sushi ta core riba caminda publico.
Despues di a hacié limpi e siman aki, a bay diahuebs y pa sorpresa a bolbe topa cu vet den e sistema. Ta suplica tur restaurant den e area pa haci uzo di e grease rack, y mantene esaki regularmente. Pa evita cu awa sushi ta bini ariba.
