Den cinco aña ainda no por caba di independisa institutonan halto di nos pais. Diaranson dia 15 di november a tuma luga un reunion entre Presidente di Parlamento mr. Edgard Vrolijk, Prome Minister mr. Evelyn Wever-Croes, mr. Helen van der Wal y mr. Arie Swean di e Commissie Versterking Democratisch Bestel, riba independisacion di e institutonan halto di estado.
A institui e comision aki na aña 2018 pa fortifica e institutonan halto di estado y ta consisti di algun experto riba tereno constitucional, den sector priva y den sector publico. Un comision multidisciplinario cu tin e tarea pa recomenda Gobierno con pa fortifica e principionan democratico. Ta fortifica democracia ora e organonan y institutonan halto di estado ta fortifica. Mas fuerte e institutonan Parlamento, Raad van Advies y Contraloria General (Algemene Rekenkamer) ta, miho nan por controla gobiernonan y mas fuerte nos democracia ta!
Prome Minister Evelyn Wever-Croes a remarca cu desde el a drenta gobernacion, el a cuminsa cu e proceso di independisa Raad van Advies, Algemene Rekenkamer y Parlamento. Independisacion di colegionan halto ta necesario pa asina nan no depende di Gobierno y por duna conseho y veredictonan obhetivo cu lo yuda democracia di nos pais.
Raad van Advies ya ta independisa y ta bayendo bon. Awor lo cuminsa cu e proceso pa independisa Algemene Rekenkamer. Parlamento ta den estado bastante avansa caba. Un Parlamento mas independiente y fuerte por haci e trabou di control miho riba un gobierno y lo tin un bon democracia pasobra e ora tin ‘checks and balances’.
Un gobierno cu no kier un democracia fuerte, ta percura pa su Parlamento, Raad van Advies, y su Contraloria General ta suak. Ta bon pa bisa cu fortificacion ta cu mester sigui nan conseho tambe pasobra ta conoci cu Gobiernonan regularmente ta keda sin sigui conseho di e institutonan aki. Mescos ta ministernan cu no ta contesta preguntanan di parlamento of ta keda sin cumpli cu mocionnan pasa of pio ainda, ta hala amiendanan di ley un banda!
Kico a sali di e reunion cu e comision, gobierno no ta menciona den su relato. E ta parce mas bien un “photo opportunity” sin ningun decision concreto riba e trabounan cu e comision a cuminsa for di cinco aña pasa caba.
