Recientemente a tuma luga e Campeonato Nacional di Domino Balashi 2021. Tur esaki a tuma luga den un transcurso di seis luna organisa pa Aruba Domino Bond. Wega final tabata entre Extreme y Noord Stars. Brouwerij Nacional Balashi tabata e patrocinado oficial di e torneo aki. Resultado pa esaki tabata cu Noord Stars a titula campeon pa di cinco aña consecutivo. Andy Farro, miembro di Noord Star Domino a splica cu e team mes a cuminsa na 1950 ora cu Aruba Domino Bond mes a cuminsa y cu semper tabatin un bataya entre e ekiponan di Old Parr Domino Team y Noord Star Domino Team.
Sinembargo, desde aña 2000 bin ariba, Noord Star a logra un total di diescinco titulo di campeon. Locual ta resalta sigur ta cu e ekipo a logra campeon invicto den e ultimo cinco añanan. Farro a sigui splica cu nan ta un team cu hermandad y amistad como base pa nan union y bondad y cu tin miembro cu tin hasta 41 aña hungando p’e ekipo aki. Farro mes ta bay haci diescinco aña ta hunga pa Noord Star y a logra un total di diesun titulo di campeon. Tambe ta di nota cu semper e famianan di e miembronan di e ekipo ta bin pa apoya nan.
Asina Farro a conta un poco di nan proceso di recluta miembro. Hopi biaha esaki ta sinta na famia di e integrantenan mes. Nan tin varios generacion por ehempel di Farro, Kock, entre otro. Aruba Domino Bond tambe lo bay duna di su parti e aña cu ta bin pa involucra e ekiponan di domino pa organisa competencia di scol pa asina e ekiponan por sigui yena nan team cu hungado di domino. Segun Farro domino ta e deporte of wega mas hunga na Aruba, sea ta na cas den fiesta of den competencia.
Pa cobertura mas amplio lesa edicion di TREMPAN mañan.
