E dianan 30 di maart pa 2 di april lo tuma lugar e di 47 edicion di e CARIFTA Games den e deporte di atletismo.
E federacion di atletismo di Bahamas a haya e oportunidad di organisa e Carifta Games unda lo celebra e di 47 edicion di e weganan aki den e stadion Thomas Robinson National Stadium na Nassau e capital di e isla Caribense.
Aña pasa e di 46 edicion di e Carifta Games a tuma lugar na nos isla ruman Corsow unda un grupo grandi di atletanan di henter Caribe a competi. Mas cu claro Aruba lo participa un bes mas cu un delegacion bon prepara bou guia di nos entrenador y coachnan miembro di e federacion di atletismo Arubano, AAF. E delegacion lo consisti di 8 atleta cu ta cla pa bataya den e diferente disciplinanan di e deporte madre di Olimpismo manera 100m sprint, 200m sprint, 400m, 800m, 1500m, discus, long jump, high jump, shotput y Octathlon.
E atletanan cu lo representa nos dushi isla na Bahamas lo ta atleta J-rick Maduro di 14 anja lo competi den 800m y 1500m mientras cu atleta Zygion Croes di 15 anja lo competi den Kogel y Speer, atleta Luis Erasmus di 16 anja lo competi den 100m y Verspringen, atleta Tariq Polonius di 17 anja lo competi den 100m y 200m, Wuil Vrolijk lo competi den Octathlon den 8 disciplina incluyendo Hoogspringen, Aureen Lampe di 18 anja lo competi den Discuswerpen y Speerwerpen, Shawney Coenraad di 18 anja lo competi den Kogelstoten y Discuswerpen y por ultimo, Toni lisa Brown di 18 anja lo competi den 100m y Long Jump. E dos oficialnan di team lo ta Ericko Pieternela y Virginia Dirksz, mientras Evelyn Farrell lo ta e Congress Delegate.
Despues di a prepara nan mes un temporada largo pa loke ta e competencia aki porfin e siman tan spera a yega pa nos muchanan. No tin duda cu nos lo bay lucha contra e mihonan den Caribe cu ta conoci pa nan nivel mundial sigur un Jamaica, Barbados y e propio Bahamas.
Stichting Sportsubsidie Aruba ta subsidia e biahe di e delegacion di Aruba pa e Carifta Games den atletismo na Nassau, Bahamas.
Cumprando weganan di Lotto, e Loteria di Aruba manera Catochi, 1-Off, Big 4, Zodiac, Wega di Number Korsou, Lotto di Dia, Lotto 5, Mini Mega cu su Mega Plus y e diferente weganan di Raspa Y Gana bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Stichting Sportsubsidie Aruba.
