Diabierna ultimo tabata tin un reunion entre docentenan di 6 scol y parlamentarionan di fraccion di MEP, AVP y POR. Esaki a tuma luga na MFA Paradera. Segun docente Richard Vrolijk, nan opinion ta keda manera tabata. Na veld, na scol por mira cu e docentenan tin e tension, e ansha, e angustia. Esey ta pone cu diariamente e trabao na scol, un docente cu no ta trankil, no ta funciona optimalmente. Tin su preocupacionnan. Ora cu e yega cas, su bida familiar tambe ta cambia, pasobra e no tin e siguridad. Si bo no tin e siguridad, ta hopi cos ta hunga un rol. Bo a haci un hipoteca por ehempel. No solamente e futuro di e famia, pero e futuro general. Tur eseynan ta visibel na scol. Esey ta e topico mas papia den koffiekamer ora cu e docentenan ta bin un rato, haya un chens pa bebe koffie y ta esey ta e tema cu diariamente ta scucha.

Rol di e docente

Vrolijk ta sigui comenta cu e idea tras di e stichting, pa por a yega asina leu, mester a consulta veld prome. Mester a bay na e maestronan prome. Diariamente e problemanan ta basta grandi. Tin cu cuminsa cu e Randvoorwaarden prome pa e scolnan funciona bon y una bes cu nan ta funciona bon, e ora ta mira e siguiente paso si ta bay den un stichting. Pero pa pone tension den veld, e ta haci su efectonan.

Mas reaccion

Sonia Goedhoop, tabata un di e docentenan cu tabata hopi critico durante e reunion hunto cu e parlamentarionan na MFA Paradera. Ta na su luga pa e parlamentarionan aki scucha e docentenan, pasobra na final e tin cu pasa parlamento y ta nan tin cu aproba cualkier cambio.

El a comenta cu personalmente e ta haya hopi importante cu un biaha mas nan por tabata den un otro setting. E ta contento pasobra e por a asisti cu henter su team, pa loke ta e setting aki. E mes ta docente na Commandeur Pieter Boer Kleuterschool y e ta cabesante. Tabata importante pa tende e preocupacion di e maestronan cu ta para den klas mes. Algo cu eigenlijk a conmove Goekhoop ta e expresion di un docente cu ta 6 aña den servicio temporal y awo cu e cambionan aki cu e ta pensa cu mester bin, e ta hopi nervioso, hopi preocupa, pasobra como un maestra hoben, cu mester crece ainda den bida cu su famia y tur loke e kier haci pa logra den bida, manera un lening na banco pa traha su cas of pa cumpra un auto, cu cada rato mester wordo teni na cuenta cu eigenlijk e ta den un tijdelijke dienst y e no tin nada concreto ainda cu e por haya un lening manera mester ta.

Esey toch ta ponebo pensa cu e lo ta hopi bon pa prome cu stap over na decisionnan, pa pensa bon con esaki lo por perhudica realmente e maestronan den veld cu hopi di nan ta hopi hoben ainda y nan ta duna hopi di nan parti. Scol ta encera masha hopi mes. Hopi energia, hopi trabao. Pero tambe e dedicacion cu nan ta duna tur dia. Banda di esey, como un persona, bo kier un siguridad den bida pa unda bo ta para y kico tur bo por logra den bo posicion cu bo ta.

Reunionnan

E reaccion di e parlamentarionan ta cu si e docentenan no tin un dragvlak, nan no ta bay sostene algo asina. Segun Goedhoop, dado momento personalmente cu cosnan mester bin riba papel. A tende asina hopi di status di e maestronan, otro banda cu ta bisa cu si bo ta perde bo beneficionan. Otro banda minister ta bisa cu no. Un caminda mester bin algo preto riba blanco cu ta demostra tur hende con si tur cos lo keda mesun cos y e siguridad cu e persona por haya. Loke ta duidelijk si ta cu ora bo ta den un stichting, e por ta un otro forma y esey ta un tiki preocupante pa e docentenan cu ta traha den scolnan publico pa tanto aña.

Mester scucha veld

Trabao di e gobierno ta pa scucha veld y mester tuma tempo. Enseñansa ta algo hopi fragil, hopi gevoelig, hopi emocion, hopi energia ta wordo poni den dje y pa tuma decisionnan, mester tuma tempo pa splica hende bon, pone loke e mester ta riba papel, pa por compronde otro y pa no keda papia banda di otro y tur hende crea nan mesun idea. Tuma tempo y haci esaki algo cu ta dialogabel. Informa tur hende debidamente prome cu bisa cu ta yega na cierto decisionnan.