Ta drenta Gobierno y tin un vision y plan pa sigur 4 pa 8 aña cu bo kier ehecuta segun minister di Turismo Dangui Oduber. Si pone short term, mid term y long term. Den short term kier drecha e area di high rise. Tin fondonan disponibel pa haci esaki y lo cuminsa den e area di Brickel Bay. Otro aña lo sigui riba henter e high rise strip, hunto, den colaboracion cu DOW. Pa loke ta Caya Betico Croes. Manera cu aña habri lo institui un comision permanente. Tabata tin O-bid, pero si papia cu comerciantenan, nunca esaki a funciona realmente. Tin cu bay tuma un decision kico lo bay haci cu O-bid, si e ta keda existi of expande esaki of ta bin cu un comision nobo. Esey ta e intension di Gobierno pa institui un comision permanente pa atende cu caya pasobra na momento cu Caya Betico Croes haya bida bek, comerciantenan cuminsa bay bek den caya, haya restaurant, haya cafe y circulacion di hende, e ta bon pa Gobierno, e ta bon pa comunidad y comerciante y ta crea empleo cu ta necesario na e momentonan aki. Pa loke ta trata short term, kier drecha e area di high rise. Mid term kier bay atende cu Caya Betico Croes y Long term implementa e vision di Ministerio di turismo, cu ta enfoca riba e programa di certificacion y servicio di calidad, riba productonan di calidad, riba inversionnan di calidad cu Aruba no conoce ainda. Durante campaña a anuncia proyectonan di Bushiri, cu awor aki ruinanan a wordo basha abao. Tin full un area habri, pero ta discusionnan cu ta hibando den Gobierno mes pa mira kico ta bay haci cu e area. Tin e area di APA tambe cu ta habri pa full un desaroyo. Sea cu ta laga e tereno di Bushiri habri y ta aloca e hotel cu a anuncia riba e tereno di APA, pero esey ta cuestion di papia cu inversionistanan tambe cu a mustra interes. Normalmente ora inversionistanan scoge pa inverti, e kier e beachfront. E beach e ta desea. Ta cuestion di negociacionnan cu tin cu bay haci cu tur inversionista cu a mustra interes y tin e disponibilidad di inverti pero riba e tereno di APA, ya e ora ta mantene e beach habri pa pueblo, pasobra bo ta sinti den comunidad cu comunidad kier mira desaroyo, pero comunidad no kier mira desaroyonan grandi. Nan ta boga pa espacionan habri manera Bushiri. Ora cu a anuncia plan, a tene cuenta cu esaki cu si en caso bin cu desaroyo mes, ta tene henter e area entre Bushiri y Tamarijn habri, pa pueblo haci uzo di e beach. Ta plannan cu tin cu ta bay wordo ehecuta. A haya varios presentacion pa proyectonan hotelero na San Nicolas. Dos proyecto. Un di nan cu a sinta na mesa, a haya varios toezegging di gobierno anterior cu nan ta cla pa ranca sali y nan tey keto bay. A haya un presentacion di nan, un proyecto all inclusive di calidad mas halto di loke tin awor aki na Aruba. Pero ta decision como gobierno tin cu bay tuma si ta para tras di e proyectonan aki pasobra San Nicolas, e refineria te ainda no tin claridad riba dje. Basta ehecutivo di Citgo ta encarcela. No tin ningun bista kico ta bay pasa cu e refineria. E ora tin cu cuminsa pensa caba riba un desaroyo pa San Nicolas. San Nicolas a yega e momento pa tuma un decision y tambe merece un desaroyo manera e area di Noord a conoce.
