Na September, caminda cu prome minister Eman y minister de Meza a entrega un lista di prijs cu a update na Gerald Keteldijk, esaki a tum’e y a pidi Blanca Orman di e grupo di taxistanan su email, cual a manda e lista digital. Tin biaha ta haya foutnan chikito y a mande per email. Keteldijk a manda e MB digital na Orman y a keda pending pa 1 di Januari, cual ta e acuerdo cu a wordo haci na mesa, pa e drenta na vigor.
A cuminsa manda Keteldijk email, caminda cu ta bisa cu ta pending pa dia 1 di Januari y no a tende nada. A bisa e miembronan cu esaki ta acorda di parti di minister de Meza. Esaki a wordo bisa na mesa dilanti e taxistanan. A mande pa Keteldijk pa foutnan gramatico. Esey a bira drech’e despues y a mande full un lista modifica. No a haya mas contesta. No sa si Keteldijk ta den dienst ainda, of el a bay cu vakantie, pero no a haya contesta di dje. Ta manteniendo e afspraak per 1 di Januari. No a saca e lista tempran. A duna algun di e coleganan di e otro centralnan y a bisa cu per 1 di Januari ta cuminsa cun’e.
Diripiente a bin e ora sra. Valery di DTP y a cuminsa yama tur e centralnan y bisa cu e tarifa di taxi ta ilegal y no mag di uz’e y tambe cu nan lo wordo sanciona.
Orman a splica cu sra. Valery tin cu bay splica dicon, si for di September e tin e lista di prijs den nan poder, dicon nan no a traha riba dje of nan no a percura pa e lista di prijs cana su caminda legal. Ta un cortesia cu e taxistanan a propone e tarifanan, e minister ta firm’e of pone su akkoord. Tin cu duna cesar loke ta di cesar. Tin cu reconoce cu a bin cambio di Gobierno y esey por ta lo a trece confusion. A purba di contesta sra. Valery, pero e mes a bisa cu e ta cu vakantie. Si bo ta cu vakantie, pakico bo ta tuma tempo pa yama tur central y bisa tur taxista cu e prijsnan ta ilegal. Despues ta bira mand’e den noticia. Ta purba di maneha esaki interno, pero toch a bay den noticia, manera cu ta paar di boef e taxistanan ta cu ta haciendo cosnan ilegal y nan no ta di acuerdo.
E acuerdo a wordo ahusta na 2009. E no a wordo drecha nunca. Hopi hende ta bisa pa hisa tarifa, pero ora traha riba dje, ta un trabao di magnitud basta grandi. Bo no ta handle cu un prijs so, sino e prijs di diferente bario cu tin rond di dje. Tin cu percura pa tur cos ta klop.
Sra. Valery a bisa cu e ta sanciona e taxistanan. Si bay bek den ley, no tin nada poni pa e tarifa cu e mester ta firma pa minister etc. Locual ta poni den ley ainda pa taxi, ta cu ta uza taximeter y tur hende na Aruba sa cu no tin taximeter. Bo ta wak cu e departamento di DTP, den tur e añanan aki, tur cos ta outdated ainda.
Segun Orman, Chris Romero ta minister di e departamento y a mand’e carta caba pa reuni cun’e. Pero e ta drenta den e departamento y haya e problemanan aki. Tin hopi cos outdated.
DTP tabata tin e lista den nan poder for di September y nan no a haci nada cun’e. Awo cu e taxistanan ta manteniendo nan acuerdo per 1 di Januari, awo kier bin stop e taxistanan, awo cu kier comunica cun’e, e ta bisa cu e ta cu vakantie, pero tin tempo si pa manda news. Tin tempo si pa yama centralnan di taxi y pa sali den news en bes di purba di papia cu e taxistanan interno pa bin na un acuerdo interno. A sali riba news pa pone un mancha preto riba e taxistanan y esey Orman no ta haya ta husto di parti di dje.
Si tin fout, si tin algo cu no a bay bon, no ta cerca e taxistanan, sino DTP mes. Cu kier sanciona, no tin sancion. Cu tin perse un lista di prijs, no ta poni den ley tampoco. Ainda nan ta bao di un taximeter, segun e Landsverordening, Orman a splica.
