Pa e abogado di e acusado Filomena Maduro, acusa di a malversa rond di 1.3 miyon florin na Departamento di Impuesto (DIMP) den un periodo di 4 aña, ta keda hopi cos cuestionabel den e investigacion.
Mr. Desiree Croes a puntra hues y fiscal si no ta haya straño cu ta acusa e señora di horta riba un miyon florin y e ta laga tur e documentonan den e oficina, den un trommel, unda por haya esakinan cualkier momento.
Durante tratamento di e caso e señora a bisa hues “mi ta inocente. Loke nan ta bisa no ta berdad.” Na Landsrecherche dado momento e acusado a stop di contesta preguntanan, pasobra e tbt a sinti cu cualkier cos cu e declara, por wordo troci.
E acusacion contra di e acusado ta cu durante un periodo d 4 aña el a malversa 1.3 miyon florin na Departamento di Impuesto. Un hecho cu e ta nenga y a splica cu tur atardi e ta ricibi e caheranan, ta conta e placa nan dilanti, haci copia di e formulario cu e ta saca di loke e computer a procesa pa entrega na director, su hefe directo y e cahera bek. Cada wisselgeldtrommel despues ta bay un kluis eyden mes, mientras cu e placa ta bay pa e kluis di e compania. E siguiente dia ta trece tur placa bek y di ey ta bay Banco Central. Tur esaki e ta haci den presencia di e cahera, su colega cu ta sinta banda di dje den un oficina di apenas 12M2. Ademas di esey tin dos camara instala den su oficina cu ta graba tur cos.
Den e investigacion a haya 134 formulario cu supuestamente e no a entrega, y no a registra den kasboek. Investigacion ta mustra cu formulario tin biaha falta nomber di cahera.
Fiscal a bisa tambe cu a haci un investigacion financiero y a constata cu berdad el a yega di gana premio diferente biaha na casino pero si compara cu loke el a gasta, anto por bisa cu e tin un perdida di 133 mil florin den cuater aña.
Pa e empleada aki cu a cuminsa na DIMP na 1988 y cu nunca tabatin un keho of reclamo contra dje, fiscal a pidi un castigo di 36 luna di cual 12 luna ta condicional y tres aña di prueba.
Abogado mr. Desiree Croes a trece dilanti cu e acusado aki a traha sin cu nunca antes tabatin cualkier keho contra dje. Na aña 2007 el a bira hefe cahera. Y despues di e sucedido, a baha cu pensioen adelanta.
Pero prome cu el a baha cu e pensioen, el a bira malo. E straño ta cu diripiente a cuminsa un investigacion interno. Nunca prome, mientras cu e tabata traha a menciona algun iregularidad. Durante cuater aña no a mira nada straño.
El a menciona cu den pasado caba Centrale Accountantsdienst Dienst a traha un rapport y a bisa cu e area ta mucho chikito, y pio pa laga placa atras eynan. Esaki e abogado a señala ta mustra cu su cliente no por haci nada scondi. Hasta el a mustra Corte potret di e tas chikito cu su cliente ta bay traha cu ne, den cual ta imposibel pa sconde asina hopi placa.
Diripiente ora cu el a bay AO, a inicia un investigacion. Dado momento tin un señora cu tabata haci e investigacion, a bin topa cu dos caha di placa pero no tabatin yabi pa habri nan. El a bisa e hendenan pa no mishi cu e caha, no habri’e y despues lo busca e yabinan.
Sinembargo sin bisa niun hende nada, ni e director, e superior di e acusado, esta e hefe O.M. a busca un compania externo bin habri e dos cahanan di placa. No a avisa e directora di antemano kico ta bay haci.
A bin haya pa casualidad e formularionan scondi eyden y tambe a haya algun otro documento tras di un cashi. A mishi cu tur esaki y despues nan a bay haci denuncia na Ministerio Publico cu e pruebanan cu pa casualidad a descubri ora cu Maduro tabata AO na cas.
Mr. Croes a cuestiona e forma di proceder aki cu no ta mustra mucho creibel. Ta straño cu un persona ta horta durante 4 aña largo y ta laga tur e pruebanan eyden mes. Mas straño ta cu ningun hende, ni e señora cu ta haci limpi, por a pasa un basora tras di e cashinan pa descubri tanto documento. Ta dificil pa kere cu un ladron cu no a descubrie durante cuater aña, cu ta logra horta 1.3 miyon y ta laga tur pruebanan na e sitio mes. Pruebanan cu facilmente por a kibra of flush door di wc por ehempel. Esaki ta algo dificil pa kere. E supuesto pruebanan aki ta parce di ta planta, segun abogado Croes.
Hefe di e acusado incluso a haya reclamo di director pasobra no a pon’e na altura y a haci cos riba su mes.
Awo ta tira culpa riba Filomena Maduro, mientras cu niun hende a mira ora cu e supervisor a haya e documentonan. No mester lubida cu e ultimo aki, mescos cu nan a acusa Filomena di dje, tambe ta bay casino regularmente.
E forma con e investigacion a tuma luga ta crea hopi duda y fuera di esaki Ministerio Publico no a prueba cu e placa berdaderamente a wordo horta, pa cual a pidi pa declara acusado Maduro liber di tur acusacion.
