Tur aña riba 6 di september tin celebracion grandi na Boneiro. E pais y su hendenan ta recorda Dia di Boneiro. Ta recorda riba e fecha aki pasobra ta dia cu Alonso de Ojeda y Amerigo Vespucci a descubri e isla na 1499.
Nan ta celebra e dia nacional aki pa recorda existencia di e isla cu ta nan cas.
E celebracion ta cuminsa mainta trempan cu un ceremonia oficial cu cantamento di e himno mientras cu ta hisa e bandera Boneriano. Ta haci entrega di reconocemento na ciudadanonan cu a traha pa mantene y promove tur loke ta patrimonio nacional y cultura di e isla.
E fecha aki ta un dia festivo oficial y hopi negoshi ta cera awe.
Despues di e ceremonia oficial, e celebracion ta sigui den e barionan di e isla. Cada aña celebracion grandi ta tuma luga den un bario specifico.
Dia di Boneiro
E bandera di e isla ta yen di simbolo y ta bula rond di e isla desde 11 di december, 1981. E ta consisti di e colornan gel, blanco, blauw, preto y cora.
E color gel ta simbolisa solo y flornan riba e isla, y principalmente e kibrahacha cu un biaha pa aña ta floria.
Blanco ta para pa paz, libertad y e caracter internacional di e isla.
E parti blauw ta representa e lama y ta recorda e Bonerianonan balente cu den tempo di guera a laga nan bida riba lama.
E renchi riba e bandera ta representa e compas y ta honra e Bonerianonan como expertonan di lama y piscado. E triangulonan ta e diferente direccion di e biento como simbolo di igualdad pa tur habitante, sin importa nan descendencia of di unda nan ta bin.
E strea cora ta para pa sanger y e poder di sobrevivencia di e Boneriano. Mientras cu e seis puntanan di e strea ta representa e prome seis barionan di Boneiro representa pa: Playa, Nikiboko, Tera Cora, Rincon, Antriol y Noord Saliña
Banda di esaki, e colornan cora, blanco y blauw di e banda ta representa lealtad di e isla na Reino Hulandes.
E himno nacional di Boneiro ta ‘Tera di Solo y biento suave’.