Diamars mainta e boluntarionan di Luna Foundation a bay den accion pa rescata un cacho den hopi mal estado. Den e situacion cu e cacho ta aden e lo muri den un siman di tempo. E boluntarionan di Luna Foundation no por a kere cu nan wowo loke cu nan a topa. Un abuso grandi contra bestia.
Un cacho cu a caba di werp algun dia pasa y tur mal comi. Parce nan a bende e yiunan di e cacho. E mama desnutri y casi no por a para riba su pia. Ora cu e boluntarionan a yega na e adres den e area di Savaneta, a pidi e doño pa wak e cacho. Un Terrier cu tabata tin ambos horea completamente di carpata. Lomba yen, pecho yen di carpata, cara y su pechonan y barica mescos. A mira carpata ta move den tur skina paden y pafo di e cas.
E rescate di Luna Foundation a yega na ora pa asina scapa e cacho di un famia cu imposibel ta stima bestia. Djis tin un cacho y no ta cuid’e ta algo serio. Un cacho na sufrimento sperando su dia di muri. Awo Luna Foundation a hiba e cacho na un luga desconoci na Playa unda e lo pasa su proceso di recuperacion. E doñonan lo no haya e cacho aki mas. Despues di pasa algun luna di recuperacion, e cacho lo haya un hogar nobo caminda nan lo cuid’e y stim’e.
Luna Foundation tin entre 100 pa 150 cacho cu nan a rescata. Algun ta bay Merca, unda ta haya un doño serio pa cuida y bira parti di nan famia. Na Aruba autoridad mester cuminsa actua cu man duro riba e hendenan cu kier cacho pero no ta cuida nan. Pa laga un cacho yega den e extremo aki, ta hopi mal bida mes e cacho a pasa aden.
Luna Foundation no ta tuma cacho pa loco pasobra ta hopi tin eyfo. Pero tin casonan extremo manera esaki cu nan no ta laga bay sin mas. P’esey a actua mesora y coy e cacho bay cu ne pa e tin un bida digno. Luna Foundation lo monitor con e cacho lo sigui reacciona e dianan venidero na e sitio cu nan a hib’e na Playa mes pa asina keda leu di cualkier otro cacho. Kisas e tin mas complicacion a consecuencia di e miles y miles di carpata cu ta cabando cu su bida. Ora e bira bon nan lo laga opera e cacho y djey lo busca un hogar bon pa e biba.
