Otro siman lo ta uno hopi druk ya cu hof lo sigui cu tratamento di e caso penal Avestruz. Den esaki e acusado principal ta ex-minister y actualmente parlamentario Benny Sevinger.
Segun e prome informacion ricibi, e prome sesion lo ta dia 13 awo pa 9:00 am y lo sigui dia 14. Durante e dos dianan aki ta dedica na scucha e testigonan pidi door di defensa, cu ta cuater persona. Tin mas testigo, pero a scucha tur e otronan caba dilanti hues comisario.
Despues riba dianan 15, 16 y 17 di mei lo repasa e dossiernan y e circunstancianan personal. Riba 20 di mei, OM lo trece e rekisitorio y den e dianan siguiente lo haya e abogadonan, repliek, dupliek y ultimo palabra.
E casonan den apelacion ta esunnan di : Maria Leoncita Arends, kende a haya 24 luna di cual 12 luna ta condicional (+50 mil florin di boet); Gaby Werleman, cu a haya castigo di 24 luna di cual 12 luna ta condicional (+ 25 mil florin di boet); Benny Sevinger, un aña di cual 6 luna ta condicional; Pieter Susebeek, 24 luna di cual 12 luna ta condicional; Carlo Mansur, 24 luna di cual 12 ta condicional (+ 25 milflorin di ; Ninosca Nuñez, 24 luna di cual 12 ta condicional (+ 25 mil florin di boet); Curt Harms (trabou pa comunidad y 15 mil florin di boet).
Den e caso den prome instancia Mary Winterdaal, Frederic Every, Franklin Abath, Ewald Biemans y Rebecca Richardson a haya vrijspraak.
