Manera tradicion, mayoria di nos federacionnan di deporte ta celebra nan actividad deportivo rond di dianan di fiesta unda ta recorda fechanan natal importante.
Dia 27 di di april proximo riba Dia di Rey, Aruba Amateur Weightlifting Association (AAWA) ta organisa e gran evento di Copa del Rey, un competencia di weightlifting Internacional, unda cu pa varios aña caba, nos isla ruman, Curacao ta bin participa. Ademas di e participacion di nos isla ruman, e ta un competencia “OPEN”, unda cu tur hende por participa.
Banda di TNT GYM, cu ta e gym unda e federacion ta entrena su atletanan, varios box di Crossfit lo participa, contando manera semper cu un team grandi di Muscles and Lungs CrossFit, bou di e number ML Barbell Club, huntu cu Crossfit A297, CrossFit Gradum Y CrossFit Eximious 462. E aña aki lo tin representantenan di un team nobo, conoci como Paradise Strength Aruba. Curacao Weight Lifting lo bin cu un team di hobennan, y asina completa e grupo grandi di atleta cu lo participa. Alrededor di 30 atleta lo compete riba e dia aki.
Ademas di esaki, durante e luna di April, Aruba Weightlifting Association tin e honor di tin Neisi Dajomes di bishita pa un luna, unda cu e dama aki di Ecuador, cu ta campeon mundial hubenil den e categoria di -75kg, y a participa na Weganan Olimpico di Rio den 2016, lo ta presente hunto cu su entrenadornan di nivel internacional. Un momento asina ta mas cu bon bini pa nos propio atletanan local ya cu un atleta y entrenadornan di taya Mundial y Olimpico por mira nan talento y potencial.
Ta invita pueblo pa bin apoya nos atletanan local, cuminsando 11:00AM na Compleho Deportivo Frans Figaroa. Entrada ta gratis. Sigur lo tin bon ambiente, huntu cu un bon competencia unda cu e batalla pa e premio prinicipal, lo ta uno fuerte!
Stichting Sportsubsidie Aruba ta subsidia e competencia internacional Copa del Rey 2018 den e deporte di weightlifting.
Cumprando weganan di Lotto, e Loteria di Aruba manera Catochi, 1-Off, Big 4, Zodiac, Wega di Number Korsou, Lotto di Dia, Lotto 5, Mini Mega cu su Mega Plus y e diferente weganan di Raspa Y Gana bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Stichting Sportsubsidie Aruba.
