Durante e fin di siman pasa e dos di prome neishi di turtuga Driekiel a worde poni na Eagle Beach/ Low Rise Hotel Area. Aña pasa tabatin un neishi na 16 di maart caba.
E voluntarionan di Turtugaruba semper ta cuminza for di 1 di Maart cu e monitoreo di e beach for di Amsterdam Manor te cu Tamarijn. Anto nan ta masha contento cu awor e temporada a cuminza realmente. Y e turistanan, specialmente di e Low Rise Hotels tabata sumamente gradecido cu tin actividad di turtuga.
Manera hopi di e turista, e turtuganan ta “repeat guests” pa hopi aña largo. E Driekiel (Leatherback Sea Turtle) ta e turtuga marino mas grandi di nos planeta. Nan no biba den e Caribe, sino den e Oceano Atlantico na unda nan haña su cuminda preferi, esta jellyfish grandi.
Pero pa pone webo e turtuga hembra semper lo regresa na su beach natal. E ta tuma un 20 aña pa un Driekiel bira adulto y 1 di 1000 naci so lo sobrebibi te madurez..Normalmente e turtuga ta subi tera anochi pa pone webo. E tin mester di un beach scur y trankil pa traha su neishi. Laga nos Arubianonan percura cu nos ofrece nos turtuganan awendia, pero tambe aki 20 aña e posibilidad pa regresa na nan beach natal, trankil y scur.
