Un desaster tin riba parkeerplaats di Arubus na Playa. Tur rond manchanan di azeta cu a wordo tapa cu santo. Esaki ta denuncia haci door di ciudadanonan.
Reporteronan di 24ora.com a bay na e sitio y a constata enberdad e daño grandi cu busnan di Arubus ta haciendo na medio ambiente. Esaki ta azeta cu ta keda ta leak ora cu e bus ta para, pero mesun cos ta sosode ora cu e ta coriendo rond.
E hecho cu e azeta aki a pega completamente den e klinkernan, cu no por ni kita nan mes cu skop, ta demostra cu no ta cos di awo cu e busnan aki ta bashando azeta di e forma aki. Informacionnan cu a yega na redaccion ta indica cu diariamente ta bashando no menos cu dos (2) bari di azeta den motor di e busnan di Arubus. E hecho aki ta demostra cu e busnan ta den super mal condicion, ilustrando un falta di mantencion, causando un mahos bista rond Aruba, na tur e luganan unda cu e busnan ta para. E gran pregunta ta si e busnan aki ta cumpli cu tur e aspectonan tecnico pa transporta ciudadanonan ainda, manera cu DTI ta exigi.
