Pastoor Jairo Maduro a lanta hopi disgusta awe mainta. Por bisa cu, for di diaranson anochi e ta hopi rabia, pa motibo di e area cu a wordo daña rond di e parokia, cu mal comportacion di hobennan cu a bin asisti na un entiero di un otro hoben cu a fayece den un accidente tragico.
Segun Pastoor Maduro, e no sa ki pa compronde di henter e situacion aki. “Un hoben cu a perde su bida ta lamentabel. E por ta perdida pa e mayornan, pero no por ta perdida pa otro. Riba e klinkernan dilanti di e misa, nan a laga masha sushi. Na prome luga, e ta un sitio di tur hende. No ta subi propiedad di hende y djis daña pa daña, pasobra emocion ta halto. Hasta boter por a haya riba propiedad di e parokia,” Pastoor Jairo ainda disgusta a bisa.
Kico esaki ta nifica pa futuro
No por papia ni di futuro mes. E ta bisa cu si un hoben daña luga di otro, ni ta respeta iglesia, no por papia di futuro di nada. Ta papia di un decadencia cu pueblo ta aden. “Nos por papia di un problema social hopi grandi, nos tin problema di famia, problema di balornan.”
E tipo di entieronan aki normalmente Pastoor Jairo no gusta tuma nan. Ora cu ta un caso asina, e no lo tuma morto den misa mas. Simplemente no tin un momento di devocion. Tur cos ta keda bao di emocion. Tur cos ta keda den un drama. Kier duna homenahe, haciendo un desordo, pero e no ta compronde pakico mester haci desordo.
E ta kere mas bien cu e miho homenahe cu por duna un defunto, ta resa p’e. Awor aki, “nos por mira con e generacion nobo ta comporta. Y ora bisa nan algo, nan ta rabia riba dje. Bo ta riba luga di hende, bo ta bin pa velorio di un amigo, bo mester bin cu respet. Loke a pasa dilanti misa, no ta un homenahe na e morto. Sino ridicules.”
Conferencia di prensa
Por a tuma nota cu e mayor a pidi cu durante 2’or di merdia pa 5’or di atardi pa ta keto y tabata keto berdad, segun Pastoor Jairo. A cera un porta banda panort di misa pa no ta un problema. Tambe el a tuma nota cu e mama a invita tur motociclista bin. Y a bisa cu na momento e morto a sali, pa haci nan cos, manera nan tin custumber di haci. Loke nan a haci dilanti misa cu nan brommer tabata un desaster.
Hacimento di limpi
E situacion aki ta algo cu ta sosode hopi. Ta p’esey hopi parokia no ta tuma tipo di entieronan asina mas. Pastoor Jairo a menciona cu no ta tuma entieronan asina, pasobra ta perdida tin. Morto ta bin y pa loke nan ta paga pa posada, velorio y respons, no ta bay cubri pa drecha tur e daño causa. E gasto aki ta bay ta mas grandi.
Esaki sigur ta disgusta hende. “Tin hende ta kere cu Pastoor no mag rabia. Si e hera manda un palabra poco skerpi riba social media pa e hecho aki, ta un avalancha di insulto ta bin den bo direccion. Ta den ki clase di sociedad ta biba, caminda cu tin cu tuma soketada di hende. E no ta bay asina,” segun pastoor Jairo.
Den futuro, e ta spera ni di accidente, ni di otro situacionnan violento, e mortonan ey no ta para den misa di Santa Cruz, mientras cu e ta pastoor.
A duna ordo na e secretaria cu no ta tuma entieronan asina mas. No ta pa descrimina, pasobra e ambiente ey no ta ambiente di spiritualidad, ni di oracion, ni di luto. Ta tipo di ambientenan aki ta hinca e parokia den perdida.
Ultimo respons
Pastoor Jairo a menciona cu famia lo por hiba nan ser keri na na funeraria, y e sacerdote por bay eynan pa resa pa e defuntonan. E famia tin cu pone e morto na funeraria of bay cas. Den e caso aki, misa paden tabata bashi. Bastante hoben a keda, aunke cu un pa un nan tabata bay afo. Ora cu cuminsa papia di un lenga cu e hobennan no compronde, nan ta sali fo’i misa. Ora cu bo ta splica e misterio di morto, ora cu bo ta splica e promesanan cu Dios ta tira den nos direccion di nos palabra pa bida eterno, e hobennan no ta compronde. Nan famia no ta biba den e esfera aki. No tin spiritualidad y nan no ta compronde nada y ta lanta bay.
Mensahe pa e hobennan
Unico mensahe cu pastoor Jairo tin, ta pa e hobennan uza nan cabes y mester tin respet pa propiedad di otro. Ohala bin un ley cu cada brommer cu haci esaki, haya un boet di mil florin, pa wak si e cos aki por caba.
