Memey di e discusionnan riba un posibel aumento di impuesto pa turista na Aruba, Tisa LaSorte, CEO di Aruba Hotel & Tourism Association (AHATA), a expresa su preocupacion p’e falta di un fase transitorio ora implementa tarifa nobo p’e bishitantenan.
E aumento aki ta uno cu gobierno a presenta na Staten den e proyecto di ley pa privatisa RWZI, planta di purificacion di awa di riool, cu e meta pa construi instalacion nobo y financiamento pa su operacion y mantencion.
LaSorte a indica cu ta fundamental proporciona un periodo di transicion pa informa adecuadamente e turistanan riba cualkier cambio den costo, specialmente pa esunnan cu ya a reserva nan vakantie y tin presupuesto fiho.
Segun LaSorte, e introduccion di un impuesto nobo por tin impacto negativo si no comunica cu claridad y cu anticipacion n’e turistanan y e empresanan di e sector. Den su declaracion, el a menciona cu e enfoke por causa inconveniente n’e bishitantenan y n’e operacionnan hotelero.
Encuanto e interaccion entre AHATA y gobierno, LaSorte a indica cu e asociacion a mantene combersacion cu Utilities NV, e compania encarga cu e NV nobo cu lo maneha e sistema di rioolering y e plantanan di tratamento di awa residual (RWZI), pero no cu gobierno directamente. Aunke tabatin dialogo cu e Minister di Naturalesa riba e plannan y e posibel implicacion di costo, AHATA no a ricibi detaye completo riba e gastonan y e hustificacion pa impuesto nobo.
LaSorte a subraya e necesidad di amplia dialogo pa inclui tambe e Minister di Infrastructura, responsabl p’e Departamento di Obranan Publico (DOW), p’asina compronde miho e infrastructura existente y con e decisionnan riba impuesto por impacta e sector turistico y e biaheronan.
