E dianan 26 pa 29 di april proximo, e dos hoben atletanan prospecto den e deporte di atletimo, Justice Dreischor y Wuill Vrolijk lo biaha pa Medellin, Colombia unda nan lo ta competiendo den e Grand Prix di Medellin. E competencia lo ta riba un solo dia esta e diasabra 28 di april. Mester bisa cu e atleta Justice Dreischor lo competi den e disciplina di 800m mientras e atleta Wuill Vrolijk lo competi den su specialidad cual ta Salto Halto. Ambos atleta ta buscando e clasificacion pa e Weganan Centro Americano y del Caribe cu lo tuma lugar den luna di juli y augustus na e ciudad Barranquilla, Colombia.
Mester bisa cu tanto Justice y Wuill ta tremendo atleta den pleno formacion. E atleta Vrolijk a caba di competi den e weganan di Carifta na Bahamas unda e la logra vence den salto halto y tambe den e 1500m. Aña pasa durante di e campeonato mundial di atletismo U20 na Nairobi, Kenya, e hoben atleta di Aruba a sa na duna un tremendo prestacion y logra keda na un di 6 lugar den e disciplina di salto halto. Di otro banda e hoben Dreischor conoci pa ta un multi-atleta a logra bon prestacion den exterior unda e la briya den e disciplina di 800m na Corsow logrando medaya di Oro.
Pa e dos atletanan hoben aki e clasificacion pa e Weganan Centro Americano y del Caribe Barranquilla 2018 lo bira uno hopi importante mirando su magnitud. E weganan aki ta e evento cu nos ta concentra mas riba dje, mas hopi cu tur e otro weganan.
Stichting Sportsubsidie Aruba ta subsidia e delegacion di atletismo pa e Grand Prix Medellin 2018.
Cumprando weganan di Lotto, e Loteria di Aruba manera Catochi, 1-Off, Big 4, Zodiac, Wega di Number Korsou, Lotto di Dia, Lotto 5, Mini Mega cu su Mega Plus y e diferente weganan di Raspa Y Gana bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Stichting Sportsubsidie Aruba.
