Minister di Asuntonan Social y Labor, Glenbert Croes, a yama un reunion pa sinta cu gremio comercial y sindical pa trata e situacion laboral despues di e 2 casonan di Coronavirus. E reunion convoca ta necesario pa evalua e impacto cu e crisis ta causando, specialmente den e mercado laboral. Ta evidente cu tin empleadonan cu ya caba a bay cas y esey ta preocupante. Anselmo Pontilius, Mediador di gobierno a indica cu cada empleado cu bay cas ta nifica cu su salario ta den problema. Esey ta nifica cu e ta un problema adicional pa Aruba.
Turismo ta e fuente principal di Aruba, esta fuente di ingreso, pero otro gremionan tambe tabata na mesa. Loke a sugeri mesora ta pa percura cu tin suficiente informacion di kico ta bay tuma luga den sector di industria di turismo, pero tambe tur otro sectornan. “Con pa purba wanta mas tanto posibel hende na trabou”, segun Pontillius. Ya caba tin un cantidad di compania a dicidi manda empleadonan di contratistanan cas.
Dialuna awo tin un emleado ta lanta sin trabou. E conseho cu nan ta duna ta mescos cu refineria a cera na 1985, di bisa e comunidad pa no bay den panico tampoco no por bay den panico pa manda hende cas. Prome cos cu mester cuida ta salarionan di hende, percura e parti solidaridad cu otro y con ta bay atende esaki na un forma nacional.
Anselmo Pontillius ta spera cu den e proximo oranan por reuni cu tur manager di hotel, restaurant, di timeshare y percura cu ta cuida pan di cada dia di cada hende, esey ta hopi importante. Tambe zorg pa aplica e parti solaridad, con e partidonan tin cu bay yega na otro. Cada trahado manda cas aworaki ta un consecuencia social grave mas di loke ya caba tin. Ademas ta hopi importante, aunke esey no tabata e punto, pa manda comunidad mensahe cu no tin motibo pa keda drenta supermecadonan y cumpra un cantidad di productonan pa loco, asina mediador di gobierno a sigui bisa.
Esey no ta yuda y e apelacion haci for di tur skina y na mesun momento denuncia esnan cu ta abusa di prijs. E apelacion na comunidad ta pa no gasta placa innecesariamente cumprando yen producto. E ta kere cu den un forma trankil tur por atende cu esaki, e no ta un problema, pero cu cabes friu por atende esaki. E apelacion logico ta keda aworaki pa tin un cooperacion mas tanto posibel, sosten di tur hende y percura pa tin pan riba mesa di mas tanto hende.
