Directie Economische Zaken, Handel en Industri (DEZHI) a haci diferente control desde oranan trempan, unda a bishita diferente supermercado den diferente districto. E departamento a pasa controla specialmente e supermercadonan cu nan a ricibi keho via social media of whatsapp. Den e ultimo dianan aki tabatin supermercadonan cu a pone prijsnan hopi halto den e momentonan aki di crisis.
Segun Maria Dijkhoff, Director di DEZHI, a remarca cu Minister di Asuntonan Economico a pidi e comerciantenan pa tene un comportacion civico riba e productonan cu tur hende mester pa cuida salud contra e Coronavirus. Pero aparentemente comerciantenan no a duna oido na e apelacion di Minister. E grupo grandi di wholesaler a presenta e anochi anterior splicando cu tin suficiente producto tanto combestibles como otronan na Aruba.
E comerciantenan mayorista a afirma cu no solamente aworaki tin stock, pero tambe tin stock na caminda. Tambe nan tin plan di contingencia si e ruta cambia. P’esey ta pidi pa no cay den panico y bay supermercado pa cumpra producto, pasobra ta duna nan e bentaha di pone prijsnan mas halto riba e productonan aki. Consumidornan tambe tin responsabilidad, mientras cu departamento di gobierno tin e responsabilidad di controla cu no ta abusa di prijsnan. Si ta mira cu un producto ta demasiado halto compara cu e prijsnan usual ta cumpra, no cumpr’e eynan y reclama e bendedo tambe.
DEZHI a ripara cu den e temponan aki tin varios supermercado cu ta abusa, p’esey lo ta hopi streng cu nan. Desde cu Minister a duna autorisacion pa bay man duro cu nan, e departamento lo haci esey pasobra esaki ta algo no acceptabel. E controlnan lo continua y tur siman e controladonan ta riba caya controlando e productonan di canasta basico. Riba e app control di prijs di Departamento di Asuntonan Economico por mira e productonan di canasta basico. Por baha esaki via Google Play of App Store y por mira e prijsnan maximo cu ta controla. Si den e supermercado e prijs ta diferente, e ora ta paga e prijs cu ta poni riba e app, asina Maria Dijkhoff a bisa. E prijs ta oficial y Gobierno ta esun cu ta dicidi eynan. Productonan manera handsanitizer, Lysoll no ta controla pa Gobierno, pero e departamento no lo permiti abuso den e prijsnan.
Controlnan lo sigui tur dia y no ta permiti pa abuso den prijs. Esaki no ta momento di gana placa riba e angustia y desesperacion di tur hende cu tin riba cuida nan salud. Den e ley ta indica cu Minister di Asuntonan Economico haya e prijsnan ta mas halto di loke ta indica, por hinca esaki den canasta basico. Si e abusonan sigui, Minister por tuma medidanan segun e ley y si abuso sigui, e lo haci esey tambe. Supermercadonan cu no cumpli lo haya un boet.
A controla mas o menos 35 luga y tur cos a bay bon, unda cu a topa cu 2 comerciante honesto di a bisa cu a subi prijsnan un tiki mas. A hala nan atencion y bisa nan cu esey no mag, segun cu loke tanto hefe di departamento como Minister a pidi pa nada di cosnan aki pasa. Diabierna desde oranan di merdia Departamento di Asuntonan Economico a cuminsa ricibi kehonan cu prijsnan a subi. Esey a pone cu Minister a tuma e decision pa haci e controlnan aki. Haciendo e controlnan aki a ripara cu casi henter Aruba a sali cumpra productonan y esey a pone cu practicamente no a haya cosnan cu prijsnan halto.
