Relaciona cu Coronavirus, boticanan, siguiendo protocolnan internacional, a adapta nan maneho y forma di entrega remedi. Manera ta conoci, tur pashent, cu e virus of no, lo yega un botica pa busca remedi. Kier evita cu den e proceso ey ta pega e empleadonan of otro clientenan wardando riba remedi of cumprando producto paden.
Por a nota cu boticanan a laga instala tent pafo pa eybou atende cu peticion di clientenan. E ta un sistema igual na ora e boticanan ta “na warda” pues cu no por drenta paden y haya acceso na e productonan medico. “E maneho aki ta pa cuida nos mesun empleadonan y nos clientenan”, asina un boticario a sigura na nos awe.
Pa loke ta productonan specifico, clientenan ta bahando pisa riba pildernan manera “Paracetamol”, pa cual a limita entrega na pashentnan. Pa evita cu hende malo di berdad no tin acceso na e remedi aki, a limita e cantidad cu ta bende na cada cliente. Mayoria boticia na Aruba ta aplicando e mesun maneho aki.
Botica Dakota a bisa nos cu “Nos kier haci uzo de e oportunidad aki pa splica nos clientenan cu a dicidi pa atende clientenan via “luik” temporalmente. E rason pa esaki ta cu asina nos ta spera di minimalisa e transmision di COVID-19 (Coronavirus). Esaki principalmente ta pa proteha nos clientenan y tambe nos trahadonan cu lo mester sigui brinda servicio na nos clientenan pa un tempo largo. Pa esunnan cu ta sigui e ultimo desaroyonan den noticia por nota cu e unico manera pa frena e virus aki ta door evita contacto entre personanan den un luga cera, esaki yama “flattening the curve”.
