Mas y mas prueba ta loke Atraco Team a haya den un entrada hudicial diamars marduga den Weg Rooi Congo. Den e entrada hudicial aki a detene un homber Chines cu descendencia Venezolano.
E Chines aki procedente di Venezuela tin lasonan tambe cu un di e supermercadonan Chines cu tin na Cura Cabay. Nan ta envolvi den entre otro e atraco riba e famia Chines na Sero Blanco y Supermercado Chines den Caya Papa Juan Pablo den Dakota.
Despues cu e team di aresto a drenta e cas na Weg Rooi Congo 35, nan a haci e detencion necesario. Prome cu esey e merdia prome a detene un Venezolano na Airport saliendo di Aruba. E Chines descendiente Venezolano cu a keda deteni tin un chick Venezolano jong tambe. Durante listramento den e cas awe marduga a bin topa cu e dos armanan di candela uza den e atraco arma. Tambe a haya e pañanan cu e atracadonan a uza den nan atraco. Esaki ta pruebanan importante den e investigacion. Ta trata di atracadonan violento cu den un di e casonan hasta a mara famia den cas na Sero Blanco. Awor ta investigando pa mira si e mesun grupo aki tin mas atraco cometi. Ademas ta bay coy mas hende den e caso aki. E bon trabou di autoridad ta continua. Si abo tin informacion por yama tipline di polis na 11141 y keda anonimo lagando bo mensahe.
Update: 12.50 (diamars, 4 februari, 2020)
Den combersacion cu vocero policial Lito Lacle, el a splica cu aunke no a bini mucho informacion dilanti, for di momento cu cada un di e atraconan a tuma luga, autoridadnan a bin ta acumulando informacion. Ta papiando aki di e atraconan na Seroe Blanco (unda cu a bay cu basta placa) y esun na e supermercado na Rondweg.
Cifranan acumula ta mustra cu den luna di januari tabatin 6 atraco cometi. “Pero tres di na nos tin practicamente resolvi,” Lacle a bisa. Den e caso di Ritz Carlton, un joyeria atraca, tin detencion y tur cos ta mustra cu pronto lo tin mas detencion. Esun di Seroe Blanco y esun di Rondweg tin e detencionnan cu a tuma luga awe. “Comunidad por ta sigur cu nos lo resolve e otronan tambe.”
