Djaluna 3 di febrüari 2020 frakshon di MAN riba inisiativa di Parlamentario Yael Plet a entregá un inisiativa di lei pa adaptashon den nos lei di labor. Manera ta konosí ya pa hopi aña kaba no a hasi adaptashon den nos leinan di labor.
Esaki por mira klaramente ku hopi biaha un trahadó ta bira víktima di abusu laboral pa falta di leinan adekuá. Frakshon di MAN poko poko ta trata na hasi kambio/adaptashonnan den nos lei di labor na benefisio di e trahadó. E adaptashon di lei ta enserá ku tur doño di trabou tin e obligashon di duna su trahadó un ‘salarisslip” sea riba papel òf digital na momentu di pago.
Ta hopi ta e trahadónan ku a traha pa añanan largu i ta kobra fin di luna sin ta risibí un “salarisslip” pa haña un bista riba nan gastunan di entre otro impuesto, primanan sosial di SVB i demas gastunan. Si e doño no kumpli ku esaki e ta kometé infrakshon pa lei i e Inspektor di labor por imponé sanshon kontra e doño di trabou.
E motibunan prinsipal dikon a yega na e idea pa trese e kambio aki ta pa e trahadó tin komo prueba riba su “salarisslip” ki dia e la drenta den servisio i kiko ta su funshon ku e ta okupá i tambe kuantu ta e montante ku e ta wòrdu paga pa ora. Tur esakinan lo ta di gran ayudo den kombatimentu di abuzu laboral. Hopi trahadó ta wòrdu paga bou di suèldu mínimo i tambe ta laga nan ehersé diferente otro trabou di kual esei no ta e kaso konforme palabrashon. Ku esaki tantu e trahadó i esnan di Inspekshon di labor tin un bista i sa ku e doño ta kumpli ku lei si òf no durante di un kòntròl. Tambe e echo ku e trahadó tin un “salarisslip” ta pone ku e por hasi un petishon pa fiansa, debí ku un di e eksigensianan ta ku e trahadó mester ta dispone di un “salarisslip”.
Den e lei di Labor “ Arbeidsregeling 2000” ku ta un di e leinan ku e Inspektor di labor ta usa pa ehersé su trabou nos a agregá e parti di sanshon. Esaki ta nifiká ku e inspektor di Labor ta haña e outoridat pa aktua i imponé sanshon na momentu ku konstatá infrakshon kontra di e lei di labor. Aktualmente e prosedura ta ku e Inspektor di labor ta traha un procesverbaal di e infrakshon konstatá i ta manda esaki pa Ministerio Públiko. Na momento ku esaki bai Ministerio Públiko dor di prioridat riba otro kasonan esnan di labor no ta haña preferensia. Ku e kambio aki e Inspektor di labor ta haña e outoridat pa imponé sanshon na momentu ku konstatá un infrakshon ku ta violá e lei laboral. For di e reunion di 18 yüni 2018 kaminda a trata e tema di Abusu Laboral frakshon di MAN a kuminsá traha riba diferente adaptashonnan ku mester bini den leinan Laboral na Kòrsou. Frakshon di MAN lo sigui hasi esfuersonan pa mehoransa di nos lei di labor ku e meta pa protehá e klase trahadó aki na Kòrsou.
