Campeonato HEINEKEN fast pitch di Aruba Softball Bond dedica na baluartenan Jacobo Jansen y Gilbert “Nando” Maduro a continua riba veldnan na Pos Chiquito.
Den categoria A-Klas dos equipo bringando pa clasificasion na di 4 puesto pa por drenta playoff a bataya. White Joker finalmente ta saca un victoria hopi importante pa asina jega un paso mas serca na clasificasion faltando un wega desisivo pa hunga ainda contra The Prodigies. 
White Joker a anota 3 careda den promer inning y ta amplia cu 2 mas den cabez di 2 inning y un car eda di garantia mas den di 5 inning. Blackhawks a anota su unico careda den bom di promer inning pero dspues e veterano Henk Arnold a hala braza mara y no a permiti ningun careda mas. Boxscore final White Joker 6 careda, 8 hit, 2 error y ta laga 7 coredor na base. Blackhawks 1 careda, 8 hit, 5 error cual tabata desastroso pa nan y ta laga 7 coredor den circulacion. Mihor bateadornan pa White Joker ta Ludwin Dabian y Richard Filiciana di 2-1, Yhoan Ruiz y Arsan Wester ambos di 1-1, Rhajin Donata di 3-2, Mario Kock y Sandrick Wester di 3-1.
Pa Blackhawks a luci cu e madera den man den causa perdi Jeffim Jansen, Tyrone Punselie, Leonardo Dirksen di 3-1, Rodney Kellyy Johnny Winterdaal ambos di 3-2 y Clay Shipley a bay di 2-1. Henk Arnold ta enfrenta 23 bateador den 5 inning tirando 21 bola, 69 strike pa un total di 96 lansamento permitiendo 1 careda tras di 8 imparable y ta propina e muchanan di Blackhawks 6 ponche crema pa seya e victoria riba su nomber. Efraim “Fenchi”Leon ta conforma su mes cu e derota riba su nomber y ta bay 5 inning enfrentando 28 bateador lansando 41 bola, 55 strike pa un total di 96 pitch permitiendo 6 careda di cual 1 ta limpi tras di 8 hit y ta regala 4 base por bola. Play Off A-Klas ta inicia diabierna awor pa 715pm riba veldnan na Pos Chiquito. Waak pa Bo tey!
