Leak di fuel hunto cu tres planta for di servicio a causa cu un gran parti di Aruba a keda seis ora sin co
Un leak di fuel den e turbina di gas den planta di WEB tawata e causa di interupcion di coriente na diferente bario, diabierna 3 di mei den oranan laat di atardi.
Debi na e leak y e peliger di candela no tawata responsabel pa mantene e turbina den operacion y conforme protocolnan di safety, personal di planta a haya nan mes obliga di baha e turbina di gas.
Reparacion di e leak a tuma su tempo pero despues a surgi tardansa na momento di reset y restart e turbina.
En total a dura mas o menos 6 ora prome cu tur bario afecta a recupera nan suministro di coriente.
Generalmente ta uza e turbina di gas solamente den casonan di emergencia of ora demanda di coriente ta halto. Sinembargo esaki actualmente ta den operacion, door cu 2 di e motornan RECIP ta for di servicio pa reparacion y un otro ta den mantencion regular di overhaul.
E caida di biento ayera te na 1-2MW na e mesun momento ey, tambe a pone cu no tabata tin energia di biento pa por a cumpli cu e demanda halto actual.
Compara cu aña pasa, e piek di demanda pa e periodo aki ta 20-25MW mas cu aña pasa. Debi na e situacion delicado aki, WEB ta haci un apelacion na comunidad pa uza coriente conscientemente y ta pidi su disculpa pa e inconveniencia
