Henderson Burgin, habitante di Theaterstraat 11, ta denuncia un problema di awa sushi dilanti su cas. Aunke e problema ta sosode cada 2 pa 3 aña, a bira specialmente grave despues di awasero pisa di e ultimo dianan.
Burgin ta conta cu e problema a intensifica despues cu a realisa un limpiesa algun siman pasa, pero e acumulacion di awa sushi y mal holo a bolbe aparece rapidamente. E awa ta pasa bay riba e acera, pero e lodo ta keda, loke ta provoca un mal holo persistente. Aunke e no ta drenta su cas, e acumulacion aki ta suficientemente malo cu e ta afecta e luga y ta crea molester significativo.
E situacion ta specialmente preocupante debi na su cercania cu e biblioteca y e fluho constante di turista den e zona. E holo desagradabel y e sushedad visibel por afecta e experiencia di e bishitantenan y crea un imagen negativo p’e area.
Burgin ta menciona cu e mes mester haci e acera dilanti su cas limpi, ya cu ningun hende mas ta haci esaki. Aunke autoridad local ta na altura di e problema, no a tuma medida concreto pa soluciona esaki. Burgin a señala cu biblioteca generalmente ta alerta autoridad riba e problema, pero te awor aki, no a bin cu un solucion a largo plaso.
E problema ta empeora cu trafico di auto, cu ta pasa door di e caya, y ta spart awa rib’e porta di Burgin y e otro propiedadnan cercano. “Cada biaha cu auto ta pasa, nan ta spart awa riba mi porta y bentana,” Burgin ta comenta. Aunke e turistanan ainda no a reacciona, ta cuestion di tempo prome cu e problema afecta mas hende.
A pesar di e situacion, Burgin ta gradici tur esunnan cu a purba di haya un solucion y yama autoridad pa tuma medida pa resolve e problema prome cu e empeora. E ta señala cu e presencia constante di turista, ta haci cu ta ainda mas importante atende e problema di awa sushi, pa evita mayor inconveniente y posibel riesgo pa salud publico.
