Tin problema cu ta preta na Aruba. Tin hopi demanda pa cas pero no tin forma pa e ciudadano yega na cas. E cantidad di clientenan cu Fundacion Cas pa Comunidad Aruba (FCCA) por atende no ta nada cerca di e demanda. Y e speransa cu por uza parti di e surplus pa crea vivienda, tambe a bay perdi cu declaracion di Prome Minister mr. Evelyn Wever Croes.
Durante e ultimo conferencia di prensa di Gobierno di Aruba, unda cu e prome mandatario tabata presente, a puntr’e riba e tema aki. Principalmente bou di e pueblo tin e pensamento cu por uza por lo menos un parti di e surplus pa yuda baha e presion. E mandatario sinembargo tabata hopi fuerte pa bisa cu di e surplus di presupuesto no por traha cas.
Nan ta calcula cu lo yega na e suplus di un porciento, manera Hulanda a exigi, y esaki ta encera e suma di 70 miyon florin. Pero “di e surplus nos no por bay traha cas. E surplus ta pa paga debe.”
Segun e mandatario, Aruba a redobla e debe na aña 2015 y a base di esaki Hulanda ta hopi fuerte riba e punto ey. “Hulanda no kier cambia di opinion. Tur e surplus mester bay pa paga e debe cu irresponsablemente a wordo aumenta.”
Si haya un suma mas halto cu e un porciento, esey si por uza pa otro cos. El a splica cu prome cu fin di aña lo entrega e proyectonan di vivienda. “Na e momentonan aki a cuminsa inventarisa e e cantidad di terenonan cu tin, pa despues cuminsa cu e destaho publico.” Ta papia aki di companianan local y internacional cu tin e posibilidad pa construi cas. Gobierno, cu cierto facilidadnan, lo otorga e terenonan pa construi e casnan a termino corto pa cuminsa yena e bashi. FCCA su capacidad no ta suficiente pa cumpli cu e necesidad “pero hunto y riba termino mas largo, nos lo bay logra.”
