A combersa cu lider di fraccion di partido MAS drs. Marisol Tromp pa haya su punto di bista con su persona a wak e proceso a tuma luga durante cu e mocion di desconfianza cu a pasa den Parlamento na aña 2020 contra su persona y awor na aña 2024 cu a bin cu un mocion di desconfianza contra Minister Glenbert Croes.
Tromp a señala: “Holoo, tempo cu nan a baha mi como minister, tawata mas bien ‘zogenaamd’ cu nan tawata kier a trapa riba ley, y permiti cu ta haci ‘spearfishing’ tur caminda y habri pa tur hende, hasta esnan cu no tin experencia den esaki”. Durante e periodo aki su persona cu tawata minister di Medio Ambiente na aña 2020 a reuni cu tur e gremionan durante e temporada di pandemia.
Tromp a duna sugerencia como minister cu tawata formando parti di Gabinete Wever-Croes I durante e epoca aki, cu eigenlijk e ta contra regla loke tawata pidiendo encuanto “spearfishing”.
A mustra cu loke a tuma luga na aña 2020, cu hasta si kier haci excepcion a mustra con esaki tin cu cana, loke Tromp como minister durante e periodo aki a haya ta “un mocion di desconfianza den body” for di e lider di fraccion di MEP Rocco Tjon, cu awendia ta Minister di Husticia di Gabinete Wever Croes II.
E actual lider di MAS ta sigui mustra cu durante e tratamento di e mocion di desconfianza, henter e fraccion a sostene e mocion, pero cu a haya tiki voto y a pasa cu un minoria den parlamento, asina mes a retira su persona inhustamente y te cu awendia e topico no ta regla. “Tawata sa cu e topico no tawata tocante spearfishing, pero ja… nos tur sa cu e topico tawata combatimento di corupcion for di e tempo aki te awor, e mesun personanan cu awendia ta minister ta keto bay tolerando e corupcion pa sigui.”
E politico a sigui enfatisa: “No solamente ‘spirito den gobierno’, hendenan cu ta cobra sin cu di berdad tin un contract pa cumpli cu n’e, pero tin tambe hopi mas aspecto cu gobierno no ta para duro contra corupcion.”
Tromp a sigui mustra cu nan fraccion ta wak cu Minister Glenbert Croes ta “firmando pa loco”, no tin ningun caminda delinea e capacidad di carga cu gobierno lo kier delinea pa pais Aruba, No ta mencionando por ehempel: Si aki un, dos, tres of cuater aña tin un vision di e crecemento di populacion di nos isla, trahando den diferente sector laboral di Aruba.
E parlamentario ta señala cu e minister ta firmando “pa loco” ta admiti “con cu ta – ken cu ta”, sin haci un control di antecedente debido. E politico ta señala cu ta hopi peligroso loke e actual minister ta haciendo.
Si berdaderamente tin necesidad di e personanan aki, mester tin un bista cla con e populacion di e pais lo bay crece. No ta trata solamente tocante e trahado, pero si tin suficiente vivienda, cu actualmente no ta e caso.
E situacion actual di maneho di otorgamento di tereno na DIP (Directie Infrastructuur en Planning) ta “mal stanca y pega pa añas”, Tin un situacion cu Gobierno no ta trahando casnan social na cantidad manera debe ser pa esnan di menos recurso. E parlamentario ta expresa su preocupacion cu “unda ta bayendo” cu tin miles di hende y ta creando mas problema y presion social riba nos pais Aruba. Esaki ta aspectonan cu gobierno no ta papiando di dje.
Tromp ta señala cu e ta observando cu minister president ta sosteniendo Minister Glenbert Croes y cu den nan opinion, e ta un minister cu ta cometiendo actonan cu no ta cuadra cu regla. E ta admitiendo casonan cu mester ta bon controla, cual no ta.
E lider politico a mustra cu nan ta keda para tras di nan mocion di desconfianza, y “tempo lo duna rason cu e mocion di desconfianza aki ta hustifica.”
