Prome Minister mr. Evekyn Wever Croes, kende ta esun encarga tambe cu Ministerio di Infrastructura ta insisti cu e decision cu el a tuma pa depolitiza Departamento di Infrastructura y Planificacion (DIP) ta funciona. Desde cu el a tuma e decision ey, no ta tende ningun caminda mas na Aruba cu tin minister envolvi den algo di DIP.
A splica cu el a tuma e decision ey bou di e condicion di cuater wowo, loke ta nifica cu dos persona mester bay di acuerdo cu tur cos prome cu firma un documento. Y sin cu un minister tin algo di haber den e asunto.
Segun e mandatario ta splica, prome cu el a tuma e decision tur hende tabata acudi cerca un minister pa haya un tereno. El a menciona cu Marisol Tromp mes tabata cana cu lista largo di hendenan cu tabatin mester of a pidie tereno. Y el a pone un paro na e situacion ey.
El a sigura cu ningun papel ta bay cerca minister mas, ni pa dicidi kende ta haya tereno.’
Pa loke ta funcionamento di DIP, a bisa cu esey no ta algo di awo pero di hopi aña caba. Y e investigacionnan penal andando, a haci e situacion pio. Hasta el a kibra moral di e funcionarionan. Tin hopi hende ta traha cu miedo di loke por pasa, pasobra a haya nan mes envolvi sin cu nan kier den e investigacion.
E mandatario a bisa cu e kier mira e departamento funciona pa cual ta haci tur lo posibel pa nan haya e herment of haci e cambionan necesario. A inverti hopi tempo den e situacion y e ta kere cu e aña’ki lo cuminsa mira cambio.
Ultimo dia el a haya dos elogio di DIP y cu a hacie contento. E ta consciente cu tin 8 mil hende wardando, y ta haciendo un esfuerso pa mira kico tin disponibel pero no por yuda tur pareu.
Pa loke ta e director, e ta un procedura disciplinario cu ta na corte. Y mester spera cu esaki finalisa prome cu por haci algo.
