Parlamento y docentenan kier un splicacion riba problemanan den enseñansa

Diamars merdia a tuma luga un reunion publico, caminda cu a manda yama e Minister di Enseñansa, Rudy Lampe, p’asina trece claridad pa loke ta e problemanan cu tin cu TraiMerdia, SPO y demas temanan.

Fraccion di AVP tabata hopi skerpi pa loke ta un carta cu a sali riba vision di e Minister of su comentario riba loke ta trata TraiMerdia.

Fraccion di AVP no ta confia e Minister

Parlamentario Marlon Sneek di AVP, a splica cu ta un falta di respet. Na momento cu ta bay insinua cu maestronan por laga nan mes wordo cumpra of guia. Nan tin nan sindicato, cual ta hendenan educa.
Nan mester para pa nan mes.Ta un falta di respet cu ta haya un Minister ta insinua cu e hendenan aki ta wordo guia, siendo cu tin pruebanan palpabel cu e hendenan aki tin rason.
Con por kita un huiswerkbegeleiding for di e grupo aki. Con bo kier kita esun cu tin cu duna nan e trainingnan, pa nan por prepara nan mes pa duna e trabao. Ta un structura hinca den otro. Mescos cu ta haya esnan di SPO. A puntr’e si SPO Santa Cruz ta keda intacto, cual el a contesta cu si. Pero den e mesun contesta ta indica cu no ta bay haya mucha nobo e aña aki. Esey ta nifica cu e scol cu tin structura di cuater klas, aki tres aña e no lo bay existi mas, pasobra no ta bay studiante nobo mas, pasobra nan ta bay Brazil.

 

Den un  manera sushi e ta haci loke e kier y esey ta loke cu AVP ta condena. Nan ta haya cu e minister mester ta sincero cu e maestronan. Pero no bay gaña e hendenancu otro cosnan y despues pa bisa cu nan no a compronde.
Mescos cu ta bisa cu supuestamente tin mucha cu no mester ta eynan, caminda cu a haya presentacion di e juffrouwnan di SPO, caminda cu nan ta mustra cu nan mes a saca afo cu tabata tin algun alumno cu no mester tabata cerca nan y nan mes a percura pa hincanan den otro scol. E minister a tira para riba e hendenan aki y ken cu scucha ta kere cu ta algun echado di baina ta dunando les, cual ta inaceptabel. E minister aki, manera cu a trece p’adilanti, no ta un minister di confia.

Mester mas claridad

Di parti di fraccion di MEP, Parlamentario Edgard Vrolijk a menciona cu e ta esun cu a pidi e encuentro aki, sigur pa trece claridad. Como maestro, sigur e aña escolar ta caba y sigur como maestro kier drenta den un trankilidad y siguridad. Esey ta nifica cu ora cu e aña escolar cuminsa mester sa precisamente unda nan lo bay y sigui den e siguiente aña, pasobra bo ta prepara bo mes pa full un aña escolar y tin biaha ora tin un proyecto pa cinco aña, bo tin cu sigui’e.
Den e aspecto aki a dicidi bin cu e reunion pa e Minister duna reaccion unda e kier bay cu TraiMerdia. E hendenan tin mester di claridad. E Minister a contesta varios cos cu a cumpli cu loke el a pidi. Tin algun cos cu no a yega na dje y e Minister tin cu sigui splica su mes.
Si no bin claridad, mester sigui esaki den un otro escena. P’esey a dicidi pa bin cu un “bijeenkomst” p’asina e Minister duna su contestanan. Si Parlamento no ta contento y comunidad no ta contento, lo bin cu un reunion publico, unda cu por instrui e Minister pa para cu loke e ta haciendo.

Incertidumbre

Vrolijk, biniendo for di veld di enseñansa, a splica cu e Minister tin su maneho y kier sa unda e ta bay. Pero e mester ta concreto, cla pa tur hende. Hopi biaha tin cu envolvi e veld. Den e proyecto tin hopi cambio y cambio mester ta mas cla posibel. Esey ta loke ta e problema grandi aki. Sinta cu e hendenan, discuti riba esey y yega na un consenso. Nunca lo yega 100%. Pero si sikiera yega 80%, lo por tin un producto. Mester pensa riba e muchanan cu ta haci uzo di e TraiMerdia, SPO, etc. Ey ta caminda cu tin cu yega. Vrolijk ta spera cu por yega eynan. Siguramente pa tur hende sali gana, e Minister cu su maneho, e trahado y e muchanan. Esey ta e punto final cu tin cu yega na dje y esey ta loke cu Vrolijk lo kier yega na dje tambe, p’asina tur hende fit nan mes den dje. No por complace tur hende, pero si por complace un mayoria y tin su rating pa succes, pa Vrolijk, esey ta mas importante.

Simar ta sostene

Josephone Martilia-Albertus, Presidente di Simar, a presenta na Parlamento pa asina duna sosten na e maestronan cu tabata para pafo. Awor aki tin un preocupacion basta grandi pa loke ta e decisionnan di Minister. Si por mira SPO, TraiMerdia, MDC, tur ta forma parti di enseñansa, y ta preocupante pa mira loke ta sosodiendo aworaki.
Ora cu tende loke e trahado y docentenan ta bisa, por mira cu e minister kier innovacion, cual no ta malo. Pero e manera cu e kier trece e innovacion ta loke ta preocupante.
Pa bo trece innovacion bo mester hende pa realisa esey p’abo. Pa por haya hende pa por realisa, nan mester sostene e Minister. Pero pa nan por sostene,mester inclui nan den e innovacion, p’asina cu ora bo bin cun’e nan por realis’e. Pero si bo ta scucha loke e trahadonan, e docentenan ta bisa, e Minister no ta envolvi nan den nada. E ta bin cu su innovacion y ta impone riba nan. E ta algo hopi alarmante pa wak. No ta un docente of un trahado, sino ta un multitud masha grandi mes. Ta trata di SPO, MDC, TraiMerdia, cual ta hopi docente. Mester corda cu enseñansa ta forma parti di futuro di Aruba. E muchanan cu ta yudando actualmente den enseñansa lo tin cu dirigi Aruba aki algun aña.

Speransa di e maestronan

Pa loke ta e decision cu wordo tuma den Parlamento, Albertus a menciona cu pa porfin scucha e docente y e trahadonan. Si wak con nan a uni hunto, ta algo hopi bunita pa wak. Tur tin enseñansa na pecho, tur kier mehoransa, pero no na e manera cu e ta bayendo awor aki. Ban spera cu lo scucha nan y hunto, dialoga cu nan pa bin na un solucion.