Venezolanonan pega na Aruba no tin confiansa mas cu aki na Aruba lo logra algo pa nan yega nan pais bek pa cual a dicidi di haci un apelacion publico na Presidente Nicolas Maduro y Gobernador Victor Clark, di Falcon.
E ultimo dianan a sali diferente vuelo humanitario for di Venezuela, pa bay Uruguay y Europa pa translada personanan cu a keda pega na e pais y kendenan kier a bolbe nan pais. Pero ta parce cu vice versa no ta tumando luga. Hopi Venezolano kier bolbe nan pais, pa ta cu nan famia, pero no ta mira movecion pa cumpli cu nan deseonan.
Pa loke ta e area di e islanan aki, e problema grandi ta e suspension di vuelonan internacional tanto na Aruba como Corsou.
Y no ta solamente personanan cu a keda pega aki despues di bishita, pero tambe tin hendenan cu a drenta ilegal (via di lama), y otronan cu a drenta legal pero cu nan dia di estado a pasa caba, y hasta tin cu permiso cu no ta mira sentido pa keda mas riba e islanan.
Esaki ta motibo cu e ciudadanonan Venezolano a haci un yamada na autoridadnan di Venezuela, pa haci e tramitenan pa vuelonan humanitario por tuma luga. Esaki a keda publica den e portal di noticia Noti Falcon.
Nan a denuncia cu Gobierno di e islanan Hulandes no ta haciendo nada pa atende cu e situacion den cual e Venezolanonanta aden, di cual hopi ta practicamente riba caya, mirando cu nan “no tin recurso pa paga hospedahe y awo sin chens di bolbe nan pais”.
Nan ta spera cu Gobierno di Nicolas Maduro y Victor Clark, cu ta representa e pueblo di Falcon, intermedia pa principalmente esnan cu tabata di bishita riba e isla por bolbe nan pais y reanuda nan trabou.
