Fergino Brownbill, miembro di Parlamento di Corsou y tambe formando parti di e comision di husticia, ta resalta e papel central cu turismo ta hunga como pilar economico den e paisnan di Caribe Hulandes. Na Corsou, turismo ta un enfoke clave, pero tambe e ta pa Aruba, Boneiro y Sint Maarten. Brownbill ta enfatisa cu e presencia di turista ta fundamental p’e crecemento economico y e visibilidad internacional di e paisnan aki, loke ta rekeri garantisa cu tur cos funciona corectamente pa proteha e experiencia di e bishitante y e imagen di e destino.
E turistanan ta disfruta di e paisahenan y e diversidad cultural cu e paisnan Caribeño aki ta ofrece, pero tambe e siguridad ta un aspecto crucial, no solamente p’e bishitantenan, sino tambe p’e comunidad local. Brownbill ta admiti cu Corsou ta enfrenta un falta di personal pa combati criminalidad, creando reto den e maneho di siguridad. E gobierno di Corsou, bao di gabinete Pisas, ta trahando pa atende e problema aki, incentivando e hobennan pa uni n’e forsa policial y mehora e structura di siguridad.
Recientemente e Minister di Husticia di Corsou, Shalton Hato, a organisa un jobfair pa henter e sistema hudicial, cu e obhetivo di recluta y satisface e necesidadnan di e personal policial. Sinembargo Brownbill ta reconoce cu ta rekeri recurso fnanciero pa contrata personal y adkiri ekipo adecua. Minister Hato ta buscando fondo pa fortalece e forsa policial y mehora siguridad riba e isla, tanto p’e turistanan como p’e habitantenan.
A pesar di e retonan aki, e accionnan tuma pa Minister Hato ta dunando resultado. A observa un caida den e casonan relaciona cu actividad criminal cu mester ta atendi p’e sistema hudicial. No obstante, Brownbill ta adverti cu atende siguridad no mester limita solamente n’e ambito di husticia, tambe mester considera e aspecto social, incluyendo pobresa y economia, cu por hiba e personanan na comete acto criminal.
Pa Brownbill, e trabao aki ta implica no solamente mehora siguridad p’e turistanan, sino tambe garantisa un ambiente sigur p’e habitantenan di Corsou. E balans aki ta crucial pa mantene e crecemento economico y e stabilidad social riba e isla.
