Den e ultimo dianan, por a tuma nota cu cada biaha coriente ta bay, algun biaha ta pa un rato y otro biaha, ta dura mas hopi p’e bin bek. Esey tabata e caso diabierna tambe. Esaki por ta debi na diferente factor.
Dialuna, un biaha mas, San Nicolas y Savaneta tabata sin coriente, caminda cu NV Elmar tabata confronta problema cu distribucion di coriente den e barionan aki. Vocero di WEB Aruba NV, Asja Dongen, den un entrevista cu nos colega Marko Espinoza, a splica di e situacion di diabierna, unda cu pa motibo di un leak den turbina di gas, esaki a causa cu mester a corta den e suministro di coriente. El a indica cu normalmente e motornan Recip ta ful online, pero e turbina di gas semper nan tin e como backup. Pero door di e situacion delicado di coriente den e ultimo dianan y door cu dos di e motornan tabata for di servicio door di mantencion y un otro pa un mantencion grandi, WEB NV no tabata por a cumpli.
Otro factor cu a hunga un rol den e situacion aki, tabata e temperatura halto y biento tambe a cay pa cual e fuente di energia di biento, cu tambe ta den e combinacion di energia, a cay afo. Door di esaki, WEB no tabata por a cumpli cu suministro di coriente.
Leak den turbina di gas, ta algo cu no por premira. Ora cu el a sosode, segun protocol di siguridad mester a ‘shutdown’ e turbina di gas y esey a causa e interupcion. Y tur esey a conduci na interupcion.
BACKUP PLAN
Den pueblo ta reina e percepcion cu hopi biaha tin fayo den WEB NV. Segun vocero di WEB NV, nan tin un plan strategico di mantencion. Cada ekipo di planta tin su plan di mantencion. Dongen a indica cu mester realisa cu no tur ora e causa ta mesun causa. Tin biaha e ta den e planta, otro biaha ta un auto cu ta dal den un pal’i luz, tin biaha e fayo ta den e sistema di distribucion di ELMAR, dus cada biaha ta un otro causa. WEB tin su atencion debido p’esaki y nan cu nan tin un rol vital pa economia di Aruba. E ta un rol cu nan ta asumi su responsabilidad.
Algun siman pasa tambe tabatin un candela den WEB, pa cual Dongen a bisa cu no ta solamente e suministro di coriente, pero tambe e calor. E demanda di coriente, door di e temperatura cu a subi, e demanda a subi cu 25MW, compara cu aña pasa, cual ta hopi. Y WEB ta haci lo posibel pa sigui cumpli cu e demanda. Pero e diferente factornan ta hunga un rol y tin e atencion di e companianan con pa maneha esaki.
CAMPAÑA
WEB regularmente ta papia di spaar riba consumo di coriente, unda cu regularmente riba nan pagina di Facebook, unda cu riba nan popnews nan ta papia regularmente di esaki. Hasta WEB tin un calculador riba nan website, pa nan wak cuanto e cliente ta consumi y con pa controla y bah’e. Ora cu ta hopi calor,e consumo ta mas halto y esaki ta haci cu e demanda ta bira mas halto,
No ta un rol di WEB NV of NV Elmar solamente pa comunidad pa spaar, pero di cada un di nos por duna un poco di nan mes pa yuda pa controla e consumo, a pesar di e temperatura halto. Asina vocero di WEB Aruba NV, Asha Dongen a bisa.
