PKF Aruba su mentorship program, e unico y prome na Aruba cu un focus total riba e studiantenan di examenklas, a conclui awe. Dialuna, 6 di mei a tuma luga e ultimo sesion di e “Unlocking Gen-Z potential” mentorship program di PKF Financial Services Aruba na Abraham de Veerschool.
E programa aki a cuminsa na inicio di aña escolar 2023-2024 cu un enfoke riba empodera e studiantenan di generacion-Z cu conocementonan y skillnan ku por juda nan crece como lidernan di mañan.
Drs. Ing. Edsel Lopez, di PKF Financial Services Aruba VBA, a conta cu a tene e programa aki tur dialuna na Abraham de Veerschool, unda nan a comparti nan conocemento y experencia cu tur e studiantenan den examenklas riba topiconan importante manera time-management, self-discipline, poder di nan escogencianan personal y tambe profesional, public-speaking etc.
Durante e programa aki nan a invita dos invitado, Mr. Jason Gerling (co-fundador di BodyZone Gym Aruba), kende a guia e studiantenan riba e topico di self-confidence. El a inspira y guia e studiantenan pa tin un positive mindset y a duna consehonan practico pa cultiva confiansa propio.
Den un otro sesion nan a presenta Mr. Nicholas Gordon kende ta ex-alumno di Abraham de Veerschool y fundado di Kulture Café den San Nicolas, cu a yuda pa inspira y comparti su storia personal cu e studiantenan di su journey cu como un studiante di MAVO te na bira e fundado di Kulture Café na San Nicolas.
E sesion final a tuma luga awe, cu un discurso motivacional di Jonathan Thiel, miho conoci como Jeon. El a inspira e studiantenan cu su storia personal, di su logronan y retonan. Na mes momento a motiva cada studiante pa sigui nan soñonan y e caminda di exito.
E hoben studiante Moises Henry a sinti e sesionnan aki hopi educativo. “Mi ta sinti cu el a siñami con pa para riba mi mes y logra cosnan den bida. Mi a gusta e parti a pone nos traha un plan di con nos ta mira nos mes den bida.”
Cu e programa aki PKF Financial Services a trece e conocemento y habilidadnan necesario pa prepara e studiantenan pa nan siguiente stap den bida profesional y personal. Nan ta masha orguyoso di cada un di nan y ta desea nan tur exito cu nan examen final den e proximo simannan.
PKF Financial Services Aruba, a wordo funda na juli 2023, y asina ki ta refleha bek riba nan compromiso pa crea cambio positivo den nos comunidad.
Nan ta orguyoso di e impacto positivo cu e programa tin riba e studiantenan, specialmente na un momento cu programanan asina ta necesario y importante den nos comunidad. PKF Financial Services Aruba ta comprometi pa sigui e programa aki, inspirando y guiando mas studiante posibel cu nan futuro.
Nan ta sigur cu e programa aki lo inspira otro pa duna bek na comunidad door di comparti nan conocemento profesional y experencia cu e upcoming generation y asina sigui guia nos futuro lidernan.
Tocante PKF Financial Services Aruba
Dia 3 di juli 2023 a funda e oficina di PKF Aruba oficialmente na Aruba. PKF ta un compania mundialmente reconoci ariba e tereno di Consultancy, Audit, Tax y Accounting. A funda e oficina di PKF Aruba cu e meta pa inverti, desaroya y yuda e futuro generacion di profesional local crece y principalmente pa comparti nan experiencia y conocemento cu e comunidad.
PKF International, cu antes tabata yama “ Pannell Kerr Forster” ta un red di agencianan global di accountancy. E ta conta cu mas di 215 miembro independiente cu ta opera bou di e marca PKF den mas di 150 pais parti den cinco diferente region. Hunto nan ta conta cu 20.000 profesional y awendia e ta postula na posicion number # 14 di e miho red di accountantnan na mundo.
A funda PKF na aña 1969, ora cu cuater oficina di accountant di Australia, Canada, Inglatera y Merca a uni pa crea un asociacion internacional. Na aña 1980 e miembronan a dicidi pa uza “ Pannell Kerr Forster” como nan marca comun. Na aña 2000 a dicidi pa, en bes di uza e nomber completo, pa uza e abreviacion, esta PKF.
Tocante Edsel Lopez
Edsel N. Lopez ta un persona conoci na Aruba. E tin un historia exitoso di hopi aña di experiencia den assurance y advisory business door di traha cu e companianan di mas grandi di Hulanda y Caribe Hulandes. El a bira e prome partner Arubiano den e oficina di accountant PwC di Caribe Hulandes na aña 2001.
Tocante Herbert van Elferen
Herbert van Elferen ta un accountant certifica. El a start su carera profesional na aña 1996, y ta conta cu riba 25 aña di experiencia, cerando buki y liderando e mundo di accountancy y advisory na comercio local.
Tocante Ruthmila Steward
Ruthmila Steward a cuminsa su carera profesional na aña 2016 trahando na PwC Aruba. Unda e la siña y crece den su ramo y despues di 7 aña, a dicidi di tuma un reto diferente den su carera profesional y asina a cuminsa cu Edsel y Herbert na 2023 cu e lansamento di PKF Financial Services Aruba.
Aki ta unda tur tres profesional den nan ramo a tuma decision di cuminsa un etapa profesional nobo y asina inclui e programa aki den nan agenda tur dialuna pa comparti asina e balornan cu PKF ta para pe.
Kico PKF tin pa ofrece
E nivel di mas halto di servicio y experiencia tecnico di experto local y rond mundo. E oficinanan di miembronan di PKF International tin un reputacion di excelencia den tur area di impuesto, advisory, auditoria y solucion comercial.
Hunto ta compronde retonan cu e cliente ta enfrenta y e importancia di tuma decision firme y cu un enfoke flexibel den un ambiente compleho. Nan ta juda bo haya solucion adecua di un forma rapido y sigur. Na PKF nan sa cu cada negoshi ta diferente. Ta pa e motibo ey mes ta adapta nan servicio pa satisface e necesidadnan specifico di cada cliente.
E servicionan di PFK Aruba ta encera entre otro “Corporate Financial Services”, “Business Advisory Services”, “Valuation Services”, Tax & Legal Services” y “Financial Statement Services”.
Pa mas informacion por tuma contacto cu PKF Aruba na +297 6990990 of via email [email protected]
