Awe, Parlamento Europeo (EP) a adopta un resolucion amplio riba e crisis di COVID-19, cu un atencion special pa e paisnan y teritorionan ultramar (LGO) den Union Europeo (EU).
Riba iniciativa di e Europarlamentario Samira Rafaela (D66) y di e fraccion “Renew Europe”, ta pidi Comision Europeo (EC) y dje estadonan miembro di EU pa nan establece un fondo special di emergencia pa e LGO-nan. Esaki tambe ta inclui e seis islanan di e parti Caribense di Reino Hulandes.
Rafaela a pidi Comision Europeo (EC) pa nan mantene e drempel pa e fondo aki mas abou posibel. Dje forma cu e yudansa di emergencia por ta rapidamente desplega caminda e necesidad ta mas amplio. Hopi gobiernonan di e islanan aworaki ta yena y carga cu e problematica di e crisis actual. Tin un necesidad urgente pa aparatonan medico, material di proteccion y remedi. Tambe e situacion di pobresa y hamber ta alarmante.
Samira Rafaela: “Parlamento Europeo a pone cla awe cu e teritorionan di LGO tambe ta parti di e famia Europeo. E habitantenan tambe ta ciudadano di Union Europeo (EU). Pues nos mester prepara uno pa e otro tambe tin forsa, specialmente den tempo di crisis. Mi ta pidi pa Comision Europeo actua rapido riba e momento!”.
Rafaela a subraya e importancia y conexion cu Hulanda tin cu nos islanan Hulandes Caribense.
“Nos ta un reino. Un reino, pues ta importante tuma nota cu nos tur ta den e mesun barco akí. P’ami ta obvio cu for di Hulanda tambe nos ta mira e parti Caribense como parti di e Reino Hulandes. P’esey como Parlamentario Europeo Hulandes mi no a duda ni un seconde cu e yudansa Europeo tambe mester bini pa e islanan Hulandes Caribense. Awor ta coresponde na Hulanda y e otro paisnan di Reino pa haci tur loke ta posibel pa aplica na e fondo aki!”
