Awe tin un rol di casonan civil cu ta pendiente pa tratamento of tambe tin un lista di casonan cu en espera di un veredicto.
E prome riba rol pa haya decision den su caso ta Adelaide Oduber. Segun por a compronde, e tin diferente caso contra Gobierno. E mes a baha cu pensioen caba. Pero ta parce cu e tabatin caso(nan) pendiente di promocionnan cu nunca el a haya. Consecuentemente na momento cu el a yega momento pa baha cu pensioen, esaki a afecta e bracket den cual e ta cay.
No ta conoci si lo bay tin decision den e caso aki, pasobra ultimo tempo Corte ta pospone fecha hopi biaha.
Otro decision riba rol cu por a lesa ta esun di Kinsasha Florence van der Bliek, kende tabatin un caso contra Gobernador di Aruba.
Un decision interesante ta esun di Guilfred Besaril, ex-minister Plenipotenciario di Aruba na Hulanda. Debi na cierto situacion incorecto, el a tuma su retiro y kier a bolbe den Cuerpo Policial. Gobierno sinembargo a dun’e su retiro.
Na mei mr. Doris Canwood, abogado di Guillfred Besaril, a haya e prome chens pa duna nan banda di medaya. Nan ta kere cu no tin motibo p’esey, pasobra momento cu a haya e landsbesluit tabata falta di documento. E abogado a splica cu nan no por a entrega un bezwaar manera debe ser, esta un bezwaar motiva.
Hues a laga nan motiva nan bezwaar, pero a sigui riba dje den luna di mei. A pidi diferente stukken. Segun mr. Canwood, nan ta bay haci nan best, nan lo ta positivo.
Gobierno ta uza como basis e rapport di Centrale Accountantsdienst (CAD), cual tabata trata den Parlamento. Awo nan tin dos rapport, segun e abogado, uno ta di 2010. Den nan bezwaar a argumenta dicon CAD no tin’e corecto tur ora.
Awo t’asina leu cu tin un decision di e caso den Corte.
Ademas di eseynan, tin dos otro caso interesante. Uno cu ta veredicto den e caso cu Richard Kramers a cuminsa contra Minister di Husticia Rocco Tjon. A kit’e for di e posicion na Guarda nos Costa. Ya caba el a gana un caso y mientrastanto a pone otro hende na su luga caba.
E otro decision ta esun di e caso cu Kathy Ruiz Paskel a cuminsa contra su Minister Glenbert Croes. A kit’e for di DIMAS y a mand’e otro departamento, cu no ta igual den e funcion cu e tabatin ultimo.
Pues esaki ta loke cu tin pendiente riba e rol di dialuna mainta.
