Aña pasa caba tabatin un caso den corte den prome instancia unda cu a dicidi por retira e ambtenaar (ingeniero) cu tin 18 aña sinta na cas y no ta coopera pa haya otro funcion. Esaki ta e mesun conclusion cu corte di apelacion pa casonan di ambtenaarnan a yega na dje luna pasa.
A dicidi pa kibra e relacion di trabou pa motibo cu unilateralmente ta nenga di traha.
E funcionario aki, kende ta ingeniero di profesion, ta hinca den overtolligheidspool for di aña 2006. Y huesnan a yega na e conclusion cu e persona aki no a duna muestra di ta dispone di caracteristicanan, mentalidad of pensamento cu por spera di un ambtenaar
Mas pasobra a dun’e suficiente tempo pa sali di e pool aki. Su comportacion ta mustra cu e no kier coopera pa reactiva di ningun forma.
E ingeniero aki a drenta servicio di gobierno na aña 1990 como ambtenaar y su ultimo funcion tabata como Hoofdingenieur. Solamente den e periodo di prome di december, 2017 te cu 20 di september, 2021, a pone na disposicion di oficina di Minister di Enseñansa, Ciencia y Desaroyo Duradero. Pero despues el a pasa atrobe pa e pool ya menciona. Y semper manteniendo su salario.
Na october di aña 2021 Departamento di Recurso Humano (DRH) a cuminsa un trayecto pa pone e ambtenaarnan na cas funciona atrobe. Y a combersa cu ne dos biaha pa e purba como “juridisch beleidsmedewerker” (schaal 13) na Servicio na Defensa di Consumidor (Sedeco). Pero despues di un combersacion di solicitud cu e director, e ultimo aki a conclui cu e no ta un candidato adecuado pa nan.
Tambe tin contra dje cu na januari, 2022, a pidi su cooperacion den e campaña di vacunacion den cuadro di e pandemia di Covid-19. Pero debi cu na su parecer no ta tene cuenta cu e reglanan di siguridad, e no a traha mas cu dos dia eynan.
Gobierno a saca un circulario dia 14 di december, 2022, unda cu ta anuncia e maneho pa pone tur ambtenaar no-activo bek na trabou y cu tur hende mester coopera cu e maneho aki. Y a informa na mesun momento cu lo tin consecuencia pa esunnan cu no coopera.
Via carta y email a mand’e invitacion pa presenta dia 3 y 10 di februari, 2023. Y a bisa den e invitacion cu e ta un ordo di trabou. Y cu si no cumpli cu esaki, lo tuma medidanan disciplinario y lo pone un paro na su salario.
Cada biaha cu a hiba e dos cartanan p’e, e no tabatey y a laga nan den e brievenbus. Pero na ambos ocasion, el a topa cu e cartanan despues cu e reunion a pasa caba.
Asina mes a bolbe yam’e pa un reunion riba 16 di februari y tampoco el a acudi. Atrobe cu el a habri e brievenbus despues cu e ora di reunion a pasa caba.
Despues gobierno a dicidi via di un decreto gubernamental di 25 di april, 2023, dun’e su retiro entrante 17 di februari, 2023.
E funcionario a dicidi di bay corte, pero nan a rechasa su peticion y a conclui cu tabatin motibo hustifica pa kit’e for di trabou. Un di nan cu e no a acudi na ningun di e reunionnan.
Pa relato amplio lesa TREMPAN.
