Recientemente e entrepreneur Rubiano den produccion di biña, Hubert Yarzagaray, a haci un biahe di estudio na e region Treviso, na Italia. E biahe tabata posibel danki na e cooperacion entre e Embahada di Italia na Hulanda y Gabinete di Minister Plenipotenciario di Aruba na Hulanda.
Durante tres dia Hubert Yarzagaray a bishita diferente localidad cu ta produci biña. Asina el a haya un presentacion di Consorzio di Tutela della DOC Prosecco, unda a enfoca riba e origen di e biña prosecco, tipo y estilo di prosecco. Na Villa Sandi e presentacion a mustra riba e mescla di tradicion y innovacion den produccion di biña, unda ta haci uzo di practicanan sostenibel. Villa Sandi ta propietario di e famia Moretti Polegato.
Un otro dia Yarzagaray a bishita Giusti Wines cu ta un productor di biña prosecco cu ta basa riba desaroyonan sostenibel, sea ta social, economico of di medio ambiente. E programa a termina cu un bishita na Cantina Pizzolato, un productor di biña organico desde aña 1991.
Minister Plenipotenciario mr. Juan “Ady” Thijsen a bisa di ta contento pa mira cu e biahe aki tabata exitoso. ‘Esaki ta un di e pasonan concreto cu nos por a logra via Embahada di Italia. Mi ta hopi agradecido na e cooperacion cu nan a brinda pa haci e biahe aki posibel y cu e oportunidad pa un entrepreneur di Aruba engrandese su conocimento riba tereno di biña na e pais productor di biña mas grandi na mundo,’ asina Minister Thijsen a declara.
