Un biaha mas Gerald Vingal, ex-hefe di Inmigracion, a gana un caso contra gobierno den corte. Esaki tabata un decision cu a bini di Raad van Beroep (casonan di ambtenaar).
Aunke cu e decision di e prome corte tabata na fabor di Vingal, gobierno (gobernador) a dicidi di apela riba cuater (4) punto. Y un biaha mas un corte a rechasa tur e cuater puntonan aki y a mustra cu ningun di nan ta proba corda pa uza nan pa retira Gerald Vingal for di trabou.
Vingal no a haci uzo di abogado y a representa su mes den e caso aki, mientras cu gobierno a haci uzo di nan hurista di Departamento Huridico.
E cuater puntonan cu a uza pa bay den apelacion tabata: Violacion secresia di trabou; a tuma regalo; mal uzo di su funcion y e echo cu el a actua en pugna cu ley di comptabilidad. A conclui cu no por proba of no tin base pa uza e cuater ponencianan ey pa dun’e su retiro.
BACKGROUND
Vingal ta un funcionario publico desde augustus, 1995 y a ocupa diferente funcion den gobierno. Despues a pone na cabes di Instituto Alarma y Siguridad Aruba (IASA).
Tabatin un echo cu a tuma luga na IASA y cu gobierno a bisa cu no a bay di e forma corecto pa cual a dicidi di pone Gerald Vingal como hefe di departamento responsabel pa esaki.
Un di nan a sosode na aña 2016 ora cu a detene e funcionario K.R. Tromp, pasobra el a haci su mes culpabel na falsificacion di documento, soborno, a privilegia su mes y a haci mal uzo di su funcion. Den e caso penal ey a yama Vingal como testigo mientras cu e procedura disciplinario contra Tromp a cuminsa na 2018. Dia 25 di november, 2019 corte a conclui, cu no a prueba cu Tromp a haci su mes culpabel pa incumplimento cu su deber pa cual no por a impone un castigo disciplinario riba dje. E apelacion door di gobierno den e asunto aki, no a duna resultado tampoco. A declara e demanda no admisibel, pasobra gobierno a apela pero e hursta a lubida di manda e motibonan pakico a bay den apelacion.
VINGAL
Entrante prome di juli, 2018 Vingal a bay na disposicion di Bureau di Minister di Husticia, Siguridad y Integracion pa duracion di e periodo di gobernacion di Gabinete Wever-Croes I.
Dia 17 di juni, 2019, a detene J.V. Winterdaal, otro colaborado di IT-Analisis na IASA. Pero un aña despues Ministerio Publico a dicidi seponeer e caso contra Winterdaal, pa falta di suficiente prueba legal pa yega na un condena. No a tuma medida disciplinario contra dje.
Na december, di aña 2020, Vingal a pidi pa stop e decision pa pone na disposicion di e minister pa por bay bek su funcion como hefe di IASA. Pero e no a haya reaccion. A cuminsa cu reorganisacion di IASA na mei, 2021, cu a bira Migration Aruba (MA) y no a nombra Vingal como hefe eynan.
Dia 14 di april, 2021 a pone riba non-actief y dia 26 di mei, 2021 el a haya un carta for di gobernador, informand’e cu debi na e sucedido cu e dos funcionarionan di IASA, nan ta conclui (a base di e dossier penal) cu el a haci su mes culpabel na incumplimento pa cu su deber. Pa e motibo ey a cuminsa un investigacion disciplinario cu a finalisa cu e decreto gubernamental di su retiro riba 13 di juli, 2022. For di e tempo ey Gerald Vingal a cuminsa bringa e decision aki, entre otro cu casonan den corte. Nan a conclui cu el a causa daño na integridad y bon nomber di IASA.
A sigui un procedura unda cu Vingal a bay den obhecion, pa cual a wanta e decision di dun’e su retiro. Su obhecion tabatin base, segun corte. Ningun di e motibonan duna ta proba pa dun’e su retiro. Hasta a acus’e di ta forma parti di un organisacion criminal. E ultimo aki ni a hustifica con nan a yega na e pensamento cu e ta forma parti di un organisacion criminal.
Tur eseynan a pone cu a destrui e decision pa dun’e su retiro, pero gobernador, cu ta e autoridad concerni, a apela e decision.
Pa cuminsa Raad a splica cu pa constata cu tin un “plichtsverzuim” cu por conduci na un medida disciplinario, ta necesario cu a base di informacionnan disponibel mester haya e siguransa cu e ambtenaar en cuestion a comete loke ta acus’e di a haci. Y cu e comportacion aki por wordo considera incumplimento di su debernan.
E prome punto cu a uza contra dje ta violacion di secresia di trabou. A bisa cu Tromp a conta Vingal cu el a informa un comerciante di un accion di control di Guarda Nos Costa (GnC) riba trahadonan ilegal riba tereno di un festival dia 22 di juni, di aña 2016. Pues, e doño di trabou ta bisa cu Vingal debidamente tabata na altura di e delito cometi door di Tromp. Ademas nan ta di opinion cu como hefe, Vingal mester a actua contra Tromp. Y di e forma aki e tambe a viola e secresia di trabou.
Nan a uza tambe combersacionnan getap for di e dossier penal di Tromp y Winterdal titula: “samenvatting tapgesprekken inzage DRH bij het OM” (verslag). Y tambe a uza como ehempel un decision di Raad fecha 2 di juni, 2021.
Pero Raad ta bisa cu e caso aki riba menciona, no ta cuadra cu e situacion di Vingal. E relato den e caso di Vingal ta traha a base di combersacionnan getap for di e dossier penal di tercer partido, di Tromp y Winterdaal. Pues Vingal no por controla si e combersacionnan aki ta treci dilanti di e forma corecto y si a tuma tur e combersacionnan relevante for di loke cu a tap. Ademas, e numbernan den e relato ta mustra cu no a uza tur e combersacionnan getap y cu ta aparece den e dossier di Tromp y Winterdaal.
Ta conclui e ora cu e decision cu gobernador a tuma no a hustifica di forma suficiente cu Vingal a haci su mes culpabel na violacion di e deber di secresia.
Un otro ponencia cu a uza contra dje ta cu a tuma regalo.
Segun e doño di trabou, Vingal mes a admiti cu, sin cu el a paga p’e, un dia despues di un control di GnC nan a haya carchi di entrada pa un festival. Gobierno ta bisa cu haciendo esey, Vingal a crea e impresion di a haya carchi a cambio di informacion riba accionnan di control di GnC. Y mesun cos, nan ta bisa, ta conta pa e otro regalonan, manera banners cu e logo di IASA y un television poni na oficina di IASA na aeropuerto.
Ley ta bisa cu ta prohibi pa un ambtenaar pidi regalo of tuma un regalo di un tercer partido, si e ambtenaar sa of por sospecha cu di e forma ey nan kier logra pa e haci of no haci algo.
Raad a bisa cu e ta di acuerdo cu e prome corte, cu no ta convincentemente proba cu Vingal ta esun cu a pidi e regalonan of a tuma nan pa duna algo a cambio den su funcion como ambtenaar. E impresion so no ta suficiente.
Tambe a bisa cu e facturanan no paga di cuminda pa trahadonan di IASA lo ta un regalo. Pero Raad a bisa cu no a proba cu ta culpa di Vingal cu no a paga e facturanan, y tampoco cu e lo tabata un regalo pa cual tabata spera algo a cambio.
Pa loke ta e ponencia di mal uzo di su funcion, gobernador a trece dilanti cu durante un reunion dia 17 di juni, di 2019, Vingal a ‘hits op” trahadonan di ICT di IASA contra un decision di Conseho di Minister riba limita of hala aden nan autorisacion pa drenta e sistema di Radex. E ta un sistema pa registra pasaheronan cu ta drenta y sali di Aruba.
Vingal tabata presente den e reunion menciona. Pero pa e ponencia cu Vingal a haci mal uzo di su funcion, Raad no ta mira cu a hustifica e ponencia aki suficiente. Si el a mustra su obhecion mes pa cu esaki durante e reunion, como hefe di IASA, no por bisa cu el a haci mal uzo di su funcion.
E ultimo ponencia cu cual a bay den apelacion, ta cu el a actua en pugna cu ley di comptabilidad. Semanalmente Vingal tabata duna e trahadonan di IASA e bon pa cuminda y gobierno ta haya cu esaki mester a tuma luga via di un “onderhandse aanbesteding”. Bisando esey solamente, no a indica e motibo pakico di apelacion riba e punto ey tabata necesario. E ta demasiado general, sin produci e prueba.
CONCLUSION
Ningun di e motibonan pa cual a bay Raad van Beroep tabatin base, pa cual a ratifica e decision di aña pasa. Esta cu no tin motibo valido y hustifica pa retira Gerald Vingal.
