E campeonato di Aruba Basketball Bond a inicia diabierna na Centro Deportivo Betico Croes cu un apertura, mientras diasabra na Club Estrella a tuma luga e prome weganan di e campeonato. Fundacion Lotto pa Deporte tabata presente pa mira e prome weganan y tabata orguyoso di esaki.
Director di Fundacion Lotto pa Deporte, Di-Stefano Wernet, tabata na Club Estrella unda el a presencia e torneo di basketball. Fundacion Lotto pa Deporte tabata presente pa asina apoya e deporte. El a expresa cu den pasado nan a yuda SV Estrella cu cierto proyectonan y e fundacion t’ey pa tur deporte. Lotto tin deporte na curason y deporte ta bon p’e formacion hunto cu educacion. “Mi ta hopi contento pa t’ey na Club Estrella”, asina Di-Stefano Wernet a expresa.
Valeska Milton, President di Aruba Basketball Bond, a expresa cu e idea ta pa durante e campeonato tin otro torneo den dje al estilo campeonatonan di Merca. E torneonan aki lo bay conta tambe p’e campeonato cu ta andando. E campeonato di basketball lo termina te cu final di luna di Mei.
Durante e campeonato aki ta conta cu 21 team di 5 diferente club. E categorianan di division mini – pasarela – cadet – junioren y senioren cual ta A-klas. Den e categoria di mini tin e combinacion di mucha muhe y homber, cual e categoria aki ta te cu 12 aña. Valeska Milton a expresa cu nan ta purbando di mira ki pa haci, pasobra pasarela ta pa muchanan di 13-14 aña y awendia e edad di muchanan muhe di 14 ta un tiki fastioso. Pa esaki e federacion ta purbando di laga nan hunto cu mucha homber, di cual nan ta mirando pa engrandece basketball pa muchanan muhe.
Federacion di basketball ta invita comunidad di Aruba pa mira e weganan di basketball, cu ta tuma luga riba diabierna, diasabra y diaranson. E weganan lo tuma mayor parti na Centro Deportivo Betico Croes, mientras cu e otro torneonan manera esun di e fin di siman aki, lo tuma luga na Club Estrella. Pa luna di Maart lo tin un torneo y esaki lo tuma luga na Aruba Jrs.
