Fundacion Lotto pa Deporte (FLpD) a ricibi bishita di Sherwin Howel, Presente di Amateur Baseball Bond Aruba (ABBA), cual encuentro tabata uno ameno.
Sherwin Howel a bira Presidente di directiva di ABBA 2 aña pasa, e y su team ta trahando riba baseball pasobra e ta un di e deportenan mas grandi na Aruba. Den baseball tin mas di 3 mil atleta ta practica e deporte aki, tanto local como internacional.
Na momento cu e directiva nobo a tuma over e bond, nan a topa cu yen di problema di cual nan a dicidi di skirbi esakinan riba borchi. Pero na dado momento nan a realisa cu nan no por soluciona tur problema, di cual nan mester cuminsa soluciona nan 1 pa 1 pa asina yega na algo. Asina aki nan a cuminsa structura bek e reglanan di cas, cual tabata data di aña 1956 unda cu nan a drecha esaki. Un cambio cu nan a haci ta ora cu cuminsa cu un campeonato, ta termina esakinan. Sherwin Howel a expresa cu tabatin hopi critica riba esaki.
ABBA a cuminsa cu un programa di team nacional, unda cu nan a haci un sondeo di dicon e nivel di baseball di Aruba a baha. Hende ta perde interes despues di a haci 15 aña y a haci e sondeo aki pa mira dicon nan ta perde interes despues di haci 15 aña. Tur hende kier bira e siguiente Xander Bogaerts, unda cu tur ta hunga competitivamente y hopi serio te ora cu nan yega e edad di 15 aña. Pero na momento cu nan mira cu nan no ta haya un contract profesional, e interes ta cay. Esaki ta bin pa motibo cu no tin nada mas pa nan pa sigui bay padilanti den deporte.
E federacion a mustra Fundacion Lotto pa Deporte nan plan cu nan a hinca den otro pa mantene interesante p’e muchanan. “Esaki ta e edad unda nos no por perde e muchanan”, el a expresa. Hopi hende ta papia unda cu ta tende den comunidad di problemanan di sociedad, problemanan cu hobennan, pero kico tin p’e hobennan. Baseball ta un deporte ta un actividad extra despues di scol unda cu por practica esaki seriamente y mantene e muchanan den linea, unda dia di mañan por crea lidernan den comunidad.
E aña aki e federacion a bin cu un plan strategico pa 2018 te cu 2022, cual ta cubri e partinan di desaroyo administrativo, desaroyo general, desaroyo di hobennan, desaroyo di hungadonan elite, desaroyo tecnico, desaroyo di lidernan, di recursonan humano, marketing y comunicacion, “governance”, financia y operacional. Pa 60 aña di existencia di ABBA, e ta un federacion cu a percura pa tin campeonato di baseball y nunca nan a desaroya tur punto. El a splica Fundacion Lotto pa Deporte cu si nan sigui haci solamente campeonatonan di baseball, esaki lo cay den decadencia. P’e motibo aki nan ta trahando riba e parti operacional di tur liga cual ta forma parti di 1 di e 9 puntonan cu nan tin. Tur tarea cu nan tin den e plan strategico ta pa sigura cu deporte di baseball por sigui progresa riba un nivel hopi mas halto y pa asina Aruba por ta hopi competitivo den region.
Director di Fundacion Lotto pa Deporte, Di-Stefano Wernet, tabata contento di por a scucha tur e plannan di ABBA. El a felicita ABBA p’e trabounan cu nan ta bin ta haciendo.
